ბუდუ ზივზივაძე გერმანიის მეორე ბუნდესლიგის სიმბოლურ გუნდში მოხვდა

საქართველოს ნაკრების თავდამსხმელი, ბუდუ ზივზივაძე გერმანიის მეორე ბუნდესლიგის მეხუთე ტურის სიმბოლურ გუნდში მოხვდა.

"კარლსრუეს" ქართველმა ფორვარდმა გელზენკირხენის "შალკეს" დუბლი შეუსრულა, მისმა გუნდმა კი (2:0) მოიგო, მორიგი სამი ქულა აიღო და ლიდერობას აგრძელებს.

მატჩის შემდეგ, Kicker-ის მიერ შედგენილ მეორე ბუნდესლიგის მეხუთე სათამაშო კვირის სიმბოლურ გუნდში "კარლსრუეს" ორი ფეხბურთელი, ჯენის ბურნიჩი და ბუდუ ზივზივაძე მოხვდა.

ქართველ ფეხბურთელს ახალ სეზონში, ყველა ტურნირზე უკვე 7 გოლი აქვს გატანილი და 2 საგოლე პასი გაკეთებული. რაც შეეხება თავად სამხრეთგერმანულ გუნდს, "კარლსრუე" მეორე ბუნდესლიგაში დიუსელდორფის "ფორტუნასთან" ერთად ლიდერობს.