თორნიკე გიგაური ახალგაზრდული მსოფლიო ჩემპიონატის გამარჯვებულია

პერუს დედაქალაქ ლიმაში მიმდინარე ახალგაზრდულ მსოფლიო ჩემპიონატზე, პირველივე საშეჯიბრო დღეს, 19 წლის ქართველმა ძიუდოისტმა, თორნიკე გიგაურმა, ოქროს მედალი მოიპოვა.

როგორც თავად IJF-ის საიტზე ვკითხულობთ, 66 კგ წონითი კატეგორია 3 მთავარი პრინციპით გამოირჩა: ინტენსივობა, არაპროგნოზირებადობა და გაბედულება. თორნიკე გიგაურს არცერთი მათგანი აკლდა და დამსახურებული ჩემპიონობაც იზეიმა.

ქართველმა პირველი წრე გამოტოვა და მეორე წრეში ყაზახი, აკილჟან ჟუბატკანოვი დაამარცხა. მერვედფინალიდან გიგაურმა ლიეტუველი, სიმას პოლიკევიჩუსი გააგდო. რეიტინგის პირველი ნომერი, დილშოდბეკ ამროიევი და გიგაური მეოთხედფინალში გადაიკვეთნენ, სადაც ქართველმა უზბეკს გოლდენ სქორში აღებული იუკოთი აჯობა. ნახევარფინალი აზერბაიჯანელ ნიზამი იმრანოვთან იპონით მოიგო, ხოლო ფინალში, ნეიტრალური დროშით მოასპარეზე აბდულა პარჩიევსაც იპონით გაუსწორდა, თანაც ისე, რომ შეხვედრის დამთვარებამდე 1 წუთით ადრე, ვაზარით აგებდა.