ვიქტორ ვემბანიამამ NBA-ში მორიგი რეკორდი დაამყარა

,,სან ანტონიო სპურსმა'' ,,ვაშინგტონ უიზარდსს'' უმასპინძლა და 9-ქულიანი სხვაობით, ანგარიშით 139:130 დაამარცხა.

გამორჩეული მატჩი ჩაატარა ვიქტორ ვემბანიამამ - ფრანგი გახდა ყველაზე ახალგაზრდა ცენტრი NBA-ის ისტორიაში, რომელმაც 50 ქულის მოგროვება შეძლო. ვემბიმ დღეს 16-დან 8 სამქულიანი ჩააგდო და 50 ქულის გარდა, მის ანგარიშზე 6 მოხსნა, 3 დაფარება, 2 ასისტი და 1 ჩაჭრაც იყო.

გარდა ამისა, ბრენდონ ჯენინგსის, ლებრონ ჯეიმსისა და დევინ ბუკერის შემდეგ, ვემბანიამა ყველაზე ახალგაზრდა მოთამაშეა მათ შორის, ვისაც NBA-ში 50-ქულიანი მატჩი ჰქონია.

,,სან ანტონიო'' 6 მოგებითა და 6 მარცხით დასავლეთ კონფერენციის მე-10 პოზიციაზეა. გრეგ პოპოვიჩის გუნდი მომავალ მატჩს 16 ნოემბერს, ,,ლოს ანჯელეს ლეიკერსის'' წინააღმდეგ გამართავს.