საქართველოს ეროვნული ნაკრები ფინეთში 15 კალათბურთელით შეიკრიბება

საქართველოს ნაკრები ფინეთში 10 კალათბურთელით მიემგზავრება, სადაც 4 მოთამაშე დახვდება, ხოლო კაპიტანი თორნიკე შენგელია ეროვნულ გუნდს თამაშის დღეს, 21 ნოემბერს შეუერთდება. ჰელსინკის დედაქალაქში წამსვლელი 10 მოთამაშე ეროვნული ნაკრების მთავარმა მწვრთნელმა, ალეკსანდარ ჯიკიჩმა 17 ნოემბერს თბილისი არენაზე გამართული ვარჯიშის ბოლოს დაასახელა.

საქართველოს ეროვნული ნაკრების კალათბურთელებმა ვარჯიშის შემდეგ კომენტარი გააკეთეს:

11 ნოემბრიდან ვარჯიში 10-მა კალათბურთელმა დაიწყო, რომლებსაც 14-ში “ქუთაისის” კალათბურთელები შეუერთდნენ, რომლებმაც 13 ნოემბერს იმერულ კლუბში ფიბა ევროპის თასზე ითამაშეს. 14-ში შეუერთდა ნაკრებს ვეტერანი დუდა სანაძე, ხოლო რატი ანდრონიკაშვილის გრაფიკი შეიცვალა და ის ფინეთში ნაკრებთან ერთად, 18 ნოემბერს ჩავა.

საქართველოს ნაკრებს ჰელსინკიში ანდრონიკაშვილთან ერთად გიორგი შერმადინი, ბექა ბურჯანაძე და კამარ ბოლდუინი დახვდებიან, რომლებმაც გუშინ ესპანეთის ჩემპიონატში ითამაშეს. მოგეხსენებათ, ევროლიგის ორგანიზატორი ორგანიზაცია ულებ-ი ფიბა-ს კალენდარს არ უთანხმებს და 20-21 ნოემბერს ამ ევროტურნირის მატჩებია დაგეგმილი. შენგელიას გუნდი ვირტუსი 20 ნოემბერს ბოლონიაში თურქულ ფენერბაჰჩეს უმასპინძლებს და თორნიკე იმავე საღამოს ჰელსინკიში, ჩარტერული რეისით გაემგზავრება. 

თბილისიდან ჰელსინკიში ეროვნული ნაკრები ამ 10 მოთამაშით გაემგზავრება: 

• გიორგი ოჩხიკიძე

• ლუკა მაზიაშვილი

• მათე ხატიაშვილი

• ლუკა ლიკლიკაძე

• მათე ყავლაშვილი

• დუდა სანაძე

• კახა ჯინჭარაძე

• ალექსანდრე ფევაძე

• გიორგი კორსანტია

• ილია ლონდარიძე

შესაბამისად, ჰელსინკიში თავს მოიყრის 15 კალათბურთელი, რომელთაგან თამაშის წინა დღეს ალეკსანდარ ჯიკიჩი იმ 12 მოთამაშეს დაასახელებს, რომლებიც ფინეთთან მატჩის განაცხადში იქნებიან.

საქართველოს ნაკრები თბილისიდან ჰელსინკიში 10 კალათბურთელით დღეს გაემგზავრება.

შეგახსენებთ, რომ საქართველოს ნაკრები ევროპის 2025 წლის ჩემპიონატის საკვალიფიკაციო ტურნირის მატჩებისთვის ემზადება. ჩვენს გუნდს ფინეთთან 2 მატჩი ელის – 21 ნოემბერს ჰელსინკიში, ხოლო 24 ნოემბერს – თბილისში. აღნიშნული მატჩებისთვის მზადება ნაკრებმა ლეგიონერების გარეშე – 11 ნოემბრიდან დაიწყო, რადგან საზღვარგარეთ მყოფ კალათბურთელებს შიდაჩემპიონატისა და ევროტურნირების თამაშები აქვთ და სანამ ფიბა-ს სანაკრებო ფანჯარა ოფიციალურად არ გაიხსნება, ნაკრებში ვერ ჩამოვიდოდნენ.

საქართველოს კალათბურთის ეროვნული ფედერაცია