მსოფლიო ჩემპიონატი | ლატვიამ საფრანგეთს მოუგო და პლეი-ოფში გავიდა

მსოფლიოს საკალათბურთო ჩემპიონატის H ჯგუფში ლატვიამ საფრანგეთი 2-ქულიანი სხვაობით, ანგარიშით 88:86 დაამარცხა და მეორე მოგებით პლეი-ოფის საგზური გაინაღდა. 

შედეგად, ჯგუფიდან გასვლა საფრანგეთის ნაკრებმა ვერ შეძლო, რომელიც ოლიმპიადისა და ევრობასკეტის მოქმედი ვერცხლისმედალოსანი და მსოფლიო ჩემპიონატის მოქმედი ბრინჯაოსმედალოსანია.

ლატვიას დღევანდელ შეხვედრაში არტურს ზაგარსმა ულიდერა, რომელმაც 22 ქულა, 5 შედეგიანი გადაცემა, 2 მოხსნა და 2 ჩაჭრა მოაგროვა. 20 ქულა, 2 მოხსნა, 2 პასი და 1 ჩაჭრა იყო როლანდს სმიტსის ანგარიშზე.

ჯგუფის ბოლო ტურში ერთმანეთს კანადისა და ლატვიის ნაკრებები შეხვდებიან, სწორედ ამ მატჩში გაირკვევა პირველადგილოსანის ვინაობა. საფრანგეთი კი აუტსაიდერ ლიბანს შეხვდება.