კევინ დურანტი ამერიკის ნაკრების რეკორდსმენი გახდა

ამერიკის საკალათბურთო ნაკრებს, პარიზის ოლიმპიადის მეოთხედფინალში, მარტივი გასეირნება გამოუვიდა, მათ ბრაზილიის ეროვნული გუნდი 35-ქულიანი სხვაობით დაამარცხეს და ნახევარფინალში სერბეთს შეხვდებიან. მატჩი ისტორიული იყო კევინ დურანტისთვის, რომელიც ამერიკის საკალათბურთო ისტორიაში შევიდა (ქალებში და კაცებში), როგორც ოლიმპიადებზე ყველაზე მეტი ქულის მქონე კალათბურთელი.

დურანტმა ბრაზილიასთან შეხვედრა 11 ქულით დაამთავრა და საერთო ჯამში, ოლიმპიადებზე 494 ქულა აქვს დაგროვებული. მან ამერიკის ქალთა საკალათბურთო ნაკრების მოთამაშის, ლიზა ლესლის რეკორდი გააუმჯობესა, 4-გზის ოლიმპიურ ჩემპიონს 488 ქულა ჰქონდა დაგროვებული.

დურანტს უნდა გახდეს პირველი კაცი მოთამაშე, რომელსაც 4 ოლიმპიური ოქრო ექნება. მან ეს 2012-ში ლონდონში, 2016-ში რიო დე ჟანეიროში და 2020-ში ტოკიოში მოახერხა. ისტორიაში ყველაზე მეტი - 4 ოლიმპიური მედალი კარმელო ენტონის აქვს მოპოვებული, თუმცა აქედან ერთი ბრინჯაოა, რომელიც 2004 წლის ათენის ოლიმპიადაზე აიღო.

დურანტი NBA-ს ისტორიაში მე-8 საუკეთესო ბომბარდირია - 28 924 ქულით, აქტიურ მოთამაშეთა სიაში მე-2 ადგილს იკავებს და მხოლოდ ლებრონ ჯეიმსს ჩამორჩება (40 474 ქულა).