გორან დრაგიჩი მსოფლიო ჩემპიონატზე არ ითამაშებს

მსოფლიოს ჩემპიონატზე სლოვენიის ეროვნულ ნაკრებს გორან დრაგიჩი დააკლდება. 37 წლის კალათბურთელმა თავად განაცხადა, რომ ტურნირზე მონაწილეობის მიღებას არ აპირებს:

,,სახლში ვიქნები. თამაშს არ ვაპირებ, უკვე საკმარისი გავაკეთე. ეროვნულ ნაკრებში 16 წელი ვითამაშე, პლუს NBA და სხვა ყველაფერი. შეიძლება, იაპონიაში ჩემი გუნდის საგულშემატკივროდ წავიდე, მაგრამ თამაში გამიჭირდება,'' - თქვა დრაგიჩმა.

დრაგიჩმა 2017 წელს ეროვნული ნაკრების დატოვება გადაწყვიტა, თუმცა გასულ წელს გადაწყვეტილება შეცვალა და ევრობასკეტზე ითამაშა, სადაც მისი გუნდი მეოთხედფინალში პოლონეთთან დამარცხდა.

სლოვენიის ნაკრები მსოფლიო ჩემპიონატის F ჯგუფში საქართველოს, ვენესუელასა და კაბო ვერდეს ნაკრებებთან ერთად მოხვდა.

2023 წლის მსოფლიოს საკალათბურთო ჩემპიონატი 25 აგვისტოს დაიწყება და 10 სექტემბერს დასრულდება. წელს ტურნირს სამი ქვეყანა (იაპონია, ფილიპინები, ინდონეზია) უმასპინძლებს.