ესპანეთის საკალათბურთო ნაკრებში სერჯიო სკარიოლოს ეპოქა დასრულდა

სერჯიო სკარიოლოს ერა იმედგაცრუებით დასრულდა - ესპანეთის ნაკრები, ევრობასკეტი 2025-ის ჯგუფში ჩარჩა. ჯგუფის ბოლო შეხვედრაში, საბერძნეთთან (90:85) მარცხით, ესპანეთმა საკუთარ ისტორიაში პირველად ვერ გააღწია პლეი-ოფში.

ევროპის მოქმედი ჩემპიონების ყველაზე მტკივნეული დარტყმა საქართველოს ნაკრებმა მიაყენა, როცა ევროპის ჩემპიონატის პირველივე შეხვედრაში, ქართველებმა სენსაციური გამარჯვება მოიპოვეს (83:69). საქართველოსთან გახსნითი მარცხის შემდეგ, ესპანეთს იტალია და საბერძნეთი უნდა დაემარცხებინა. ორივე თამაშში წაგების გამო, მათ ჯგუფში მეხუთე ადგილი დაიკავეს, მხოლოდ კვიპროსს გაუსწრეს და პლეი-ოფში გასვლის შანსი დაკარგეს.

"სინდისის წინაშე მშვიდად ვარ, რადგან ყველაფერი გავწირე" - ეს სერჯიო სკარიოლოს სიტყვებია მას შემდეგ, რაც ნაკრებიდან წასვლა დაადასტურა. ის მუშაობას რეალ მადრიდში გააგრძელებს.

იტალიელი სპეციალისტი, ესპანეთის კალათბურთის ისტორიაში, ყველაზე ტიტულოვანი მწვრთნელია. 2009 წლის დებიუტის შემდეგ, მან ორი ცალკეული პერიოდი ჩაატარა (2009-2012 და 2015-2025). სკარიოლომ ესპანელებს 4-ჯერ მოაგებინა ევროპის ჩემპიონატი, ერთხელ მსოფლიო (2019 წელი) და ნაკრებს 2-ჯერ მოუტანა ოლიმპიადის მედალი (ვერცხლი და ბრინჯაო).