ზაფხულის ყველაზე ხმაურიანი თავისუფალი აგენტები

რამდენიმე წლის წინ ცოტა თუ დაიჯერებდა, რომ წელს მოჰამედ სალაჰი ლივერპულს თავისუფალი აგენტის სტატუსით დატოვებდა. ეგვიპტელმა კლუბს გასულ ზაფხულს გაფორმებული ორწლიანი კონტრაქტის გახანგრძლივების შუა პერიოდში დაემშვიდობა. მთავარი მიზეზი  არნე სლოტთან დაძაბული ურთიერთობა იყო. ერთ-ერთ განცხადებაში სალაჰმა სლოტის სტილი არ მოიწონა და თქვა, რომ კლუბს „ჰევი მეტალ“ ფეხბურთი უნდა დაებრუნებინა - სტილი, რომელიც იურგენ კლოპთან ასოცირდებოდა.

სალაჰი ლივერპულს ცხრა ბრწყინვალე სეზონის შემდეგ ტოვებს, ამ ხნის განმავლობაში ეგვიპტელმა 442 მატჩში 257 გოლი გაიტანა, მოიგო ორი პრემიერ ლიგისა და ერთი ჩემპიონთა ლიგის ტიტული.

ახალი კონტრაქტის გაფორმებამდე სალაჰს საუდის არაბეთიდან სოლიდური ფინანსური შეთავაზებები ჰქონდა მიღებული. ყველაზე დიდი შანსიც კარიერის არაბეთში გაგრძელებაა. 33 წლის ფეხბურთელმა განაცხადა, რომ მსოფლიო ჩემპიონატის შემდეგ გადაწყდება, არაბეთში გააგრძელებს კარიერას თუ ამერიკის შეერთებულ შტატებში. 

ბერნარდო სილვა უკვე წლებია მანჩესტერ სიტის დატოვებასთან ახლოსაა, მას მუდმივად აკავშირებდნენ როგორც ბარსელონასთან, ისე მის ბავშვობის კლუბ ბენფიკასთან. წელს თითქმის გადაწყვეტილია, რომ პორტუგალიელი „ეტიჰად სტედიუმს“ დატოვებს. 

ბერნარდო სილვა წლების განმავლობაში პეპ გვარდიოლას ერთ-ერთი ყველაზე სანდო ფეხბურთელი იყო. ახალწვეულთა დიდი რაოდენობის გამო პორტუგალიელმა შემტევ ტრიოში ადგილი დაკარგა, მაგრამ შესანიშნავად მოერგო ახალ როლს და ნახევარდაცვაში დაუღალავ „ბოქს-თუ-ბოქს“ მოთამაშედ ჩამოყალიბდა.

აშკარაა, რომ სილვას ჯერ კიდევ შესანიშნავ ფორმაშია. ბენფიკაში ემოციური დაბრუნება ლოგიკურ ვარიანტად ჩანს, თუმცა გავრცელებული ინფორმაციით, ფეხბურთელი ცდილობს თავისუფალი აგენტის სტატუსით ბარსელონაში გადავიდეს.  კატალონიურ კლუბში გარიგების გასაფორმებლად ბერნარდო ხელფასის შემცირებაზეც თანახმაა. სილვას მიმართ ინტერესს იჩენენ ასევე: იუვენტუსი, მადრიდის ატლეტიკო და პსჟ.

მიუხედავად იმისა, რომ ახალი კონტრაქტის შეთავაზება უკვე ჰქონდა, ვეტერანმა რობერტ ლევანდოვსკიმ კატალონიური კარიერის დასრულება გადაწყვიტა. სავარაუდოდ, ეს კლუბიდან წასვლის გადაწყვეტილება ორივე მხარისთვის ლოგიკური გადაწყვეტილებაა. 2025-26 წლების სეზონში ყველა ტურნირზე გატანილი 19 გოლი ადასტურებს, რომ პოლონელს ჯერ კიდევ შეუძლია მაღალ დონეზე თამაში. 

პოლონელ თავდამსხმელს მილანს უკვაშირებენ, კლუბთან, რომელსაც ასაკოვანი სუპერვარსკვლავების დამატების ტრადიცია აქვს. ასევე ვრცელდება ცნობები, რომ მოულოდნელ ვარიანტად შეიძლება განიხილებოდეს პორტო, სადაც ლევანდოვსკის თანამემამულეები - ოსკარ პიეტუზევსკი, იან ბედნარეკი და იაკუბ კივიორი თამაშობენ.

ამასთანავე, მისი კარიერის გაგრძელების შესაძლო მიმართულებებად განიხილება MLS და საუდის არაბეთის ლიგა. თავად ლევანდოვსკიმაც აღიარა, რომ მზად არის შედარებით სუსტ ჩემპიონატში გადასვლის შესაძლებლობა განიხილოს.

კაზემიროს მანჩესტერ იუნაიტედში მეორე სუნთქვა გაეხსნა. ბრაზილიელმა არა მხოლოდ დაიბრუნა ძველი ენერგია და სიმტკიცე, არამედ არაერთი მნიშვნელოვანი გოლიც გაიტანა, რითაც „წითელ ეშმაკებს“ ჩემპიონთა ლიგაზე დაბრუნებაში დაეხმარა.

შესაძლოა, „იუნაიტედი“ ახლა ნანობს, რომ კაზემიროს მომავალზე ნაადრევი გადაწყვეტილება მიიღო. ჯერ კიდევ იანვარში გამოცხადდა, რომ ის კონტრაქტის ამოწურვის შემდეგ კლუბს დატოვებდა. 

გულშემატკივრებს მისი დარჩენა სურთ და ტრიბუნებიდან ხშირად ისმოდა შეძახილები — „კიდევ ერთი წელი!“ თუმცა 34 წლის ფეხბურთელმა მარტში განაცხადა, რომ მისი წასვლის საკითხზე გადაწყვეტილება უკვე დიდი ხნის წინ მიიღო. 

კაზემიროს შემდეგი კლუბი შესაძლოა მაიამის ინტერი იყოს. კლუბი, რომელშიც მისი დიდი ხნის მეტოქე - ლეო მესი თამაშობს. 

დუშან ვლაჰოვიჩის მომავალი ტურინურ კლუბში ჯერ კიდევ გაურკვეველია. არ არის გამორიცხული, რომ სერბმა თვის ბოლოს კლუბი თავისუფალი აგენტის სტატუსით დატოვოს. მიუხედავად იმისა, რომ გავრცელებული ინფორმაციით, „ბიანკონერიმ“ თავდამსხმელთან ახალი კონტრაქტის შესახებ მოლაპარაკებები განაახლა.

ვრცელდება ინფორმაცია, რომ ვლაჰოვიჩი კონტრაქტზე ხელის მოწერას არ ჩქარობს. სავარაუდოდ, ვლაჰოვიჩი სხვადასხვა კლუბებისგან ელოდება შეთავაზებებს. 

სერბ ფეხბურთელს საკმაოდ მძიმე სეზონი ჰქონდა, რაც ძირითადად ბარძაყის შიდა კუნთის ტრავმამ განაპირობა, გავრცელებული ცნობებით, სწორედ ამ ტრავმის გამო იუვენტუსის უფროსობა შეშფოთებულია მისი გრძელვადიანი ფიზიკური მდგომარეობის გამო.

ამ ფონზე, შესაძლოა მხარეებისთვის საუკეთესო გამოსავალი თანამშრომლობის დასრულება იყოს. უფრო რეალისტურ შესაძლო დანიშნულების ადგილებად სახელდებიან მადრიდის ატლეტიკო, ბაიერნი და ნიუკასლი. 

პაოლო დიბალას კარიერა მძიმე ტრავმებმა ძალიან დააზარალა. რომაში კიდევ ერთი ტრავმებით დატვირთული სეზონის შემდეგ, არსებობს საფრთხე, რომ  32 წლის არგენტინელი კლუბის გარეშე დარჩეს. ასევე ვრცელდება ცნობები, რომ შესაძლოა მან ევროპაც დატოვოს.

მაისში დიბალამ განაცხადა, რომ „ჯალოროსის“ ხელმძღვანელობას მისთვის კონტრაქტის გახანგრძლივების თაობაზე ჯერ არ მიუმართავს, რამაც გააჩინა ვარაუდი, რომ კლუბი მზად იყო დაესრულებინა მისი ოთხწლიანი პერიოდი დედაქალაქურ კლუბში. მიუხედავად ტრავმებისა, დიბალა გულშემატკივართა ერთ-ერთ ყველაზე საყვარელ ფეხბურთელად იქცა.

ბოლო პერიოდში გავრცელებული ინფორმაციით, ლორენცო პელეგრინი და პაოლო დიბალა ახლოსაა ახალ ერთწლიან კონტრაქტთან, რომელიც ბონუსებსა და შესრულებულ მიზნებზე იქნება დამოკიდებული. შეთანხმება ასევე ითვალისწინებს მისი ხელფასის მნიშვნელოვან შემცირებას.