"ზუსტად ვიცოდით, რომ კვარაცხელიას ჩვენი გაძლიერება შეეძლო" - ლუის ენრიკე
საფრანგეთის ლიგა 1-ის მე-19 ტურის შეხვედრაში, "პარი სენ-ჟერმენისა" და "რეიმსის" დაპირისპირება გაიმართება. მატჩის წინ პარიზული კლუბის მთავარმა მწვრთნელმა ტრადიციული პრესკონფერენცია ჩაატარა და ჟურნალისტების კითხვებს უპასუხა.
ლუის ენრიკემ ხვიჩა კვარაცხელიას შესახებ ვრცელი კომენტარი გააკეთა და აღნიშნა, რომ ქართველ შემტევს პარიზული გრანდის გაძლიერება შეუძლია.
როგორც ყოველთვის, ახალ ფეხბურთელს მხოლოდ იმ შემთხვევაში ვიმატებთ, როდესაც გვჯერა, რომ მას ჩვენი კლუბის გაძლიერება შეუძლია. როდის ითამაშებს კვარაცხელია? დავაკვირდებით, ყველაფერი სავარჯიშო პროცესზეა დამოკიდებული, მაგრამ ამას დიდი მნიშვნელობა არ აქვს. მნიშვნელოვანია, ის რომ კვარაცხელია ჩვენთანაა და მას შესანიშნავად ესმის, თუ რას მოვითხოვთ მისგან და მთლიანად გუნდისგან. მისი შესაძლებლობები გავაანალიზეთ - ის ჩვენს სათამაშო სისტემასთან თავსებადია.
ვფიქრობ, მას შუძლია გუნდს ბევრი რამ შემატოს. ფიზიკურად, კვარაცხელია ძალიან კარგად გამოიყურება. ვნახეთ მისი ვარჯიში და შემიძლია გითხრათ, რომ გუნდთან კარგად ადაპტირდა. შეტევაში 6-7 ფეხბურთელი მყავს და ვფიქრობ, მათთან ერთად შემიძლია სხვადასხვა კომბინაციები დავსახო. - ლუის ენრიკე.
შეგახსენებთ, პარიზულმა გრანდმა "ნაპოლის" კვარას სანაცვლოდ 70 მილიონი ევრო გადაუხადა, რომელსაც სამომავლო ბონუსების სახით, შესაძლოა რამდენიმე მილიონი დაემატოს.
"ნაპოლის" მაისურით კვარაცხელიამ ყველა ტურნირზე 107 მატჩში მიიღო მონაწილეობა. კვარამ 30 გოლის გატანა და 24 საგოლე გადაცემის შესრულება შეძლო და "პარტენოპეის" ჩემპიონის ნანატრი ტიტულის მოპოვებაში დაეხმარა. "ნაპოლის" რიგებში გატარებულ სადებიუტო სეზონში, ხვიჩა კვარაცხელია იტალიის სერია A-ს საუკეთესო ფეხბურთელად და ჩემპიონთა ლიგის საუკეთესო ახალგაზრდა ფეხბურთელად დასახელდა.
სხვა სტატიები
