"ყოველთვის გვემახსოვრები" - ტრენტმა და ხაბი ალონსომ ენფილდზე ჟოტას მემორიალი მოინახულეს

4 ნოემბერს ენფილდი ჩემპიონთა ლიგის მორიგ ჯადოსნურ საღამოს უმასპინძლებს - 23:55 საათზე, ლივერპული მადრიდის რეალს დაუპირისპირდება და საკუთარი გულშემატკივრის წინაშე გამარჯვებისთვის იბრძოლებს.

მატჩამდე 24 საათით ადრე, ემილიო ბუტრაგენიომ, დინ ჰაუსენმა, ტრენტ ალექსანდრ არნოლდმა და ხაბი ალონსომ ენფილდზე დიოგო ჟოტას მემორიალი მოინახულეს და ყვავილებით შეამკეს. ტრენტმა ყოფილი თანაგუნდელის მემორიალზე სამახსოვრო ბარათიც დატოვა.

ტრენტი ლივერპულის აკადემიის აღზრდილია და მერსისაიდელებთან ერთად, პრემიერ ლიგის ნანატრი ტიტული და ჩემპიონთა ლიგა მოიგო, რის შემდეგაც კარიერის რეალში გაგრძელების გადაწყვეტილება მიიღო. რაც შეეხება ხაბი ალონსოს - 2004-09 წლებში, პროფესიონალური საფეხბურთო კარიერის გამორჩეული ეტაპი ასევე ლივერპულში გაატარა და 2005 წლის ჩემპიონთა ლიგის ჯადოსნური ფინალის ერთ-ერთი გამორჩეული წევრია.