ვინისიუსი მადრიდელ ფანებს: "მეც ადამიანი ვარ"

ვინისიუს ჟუნიორმა, ჩემპიონთა ლიგის მატჩში, მონაკოსთან (6:1) გამარჯვების შემდეგ, რეალ მადრიდის გულშემატკივრებს, ემოციური მიმართვა გაუგზავნა. ბრაზილიელმა აღიარა, რომ ბოლო დროს არსებულმა დაცინვამ მას გული ატკინა. ვინისიუსმა მომავალთან და მწვრთნელის ცვლილებასთან დაკავშირებულ სპეკულაციებზე განაცხადა, რომ ის მშვიდად რჩება კონტრაქტის განახლების თაობაზე, მიუხედავად იმისა, რომ ამოწურვამდე ერთ წელზე ცოტა მეტი დრო დარჩა.

ვინისიუსი მონაკოსთან მატჩში საუკეთესო ფეხბურთელად დასახელდა - მან 3 საგოლე გადაცემა გააკეთა და ერთი თავად გაიტანა. ამ მომენტისთვის, რეალი, ლიგის ფაზის ცხრილის მეორე ადგილზეა (15 ქულით). მართალია, სამეფო კლუბი 'კოპა დელ რეის' გათამაშებიდან გამოვარდა, თუმცა სამაგიეროდ, ლა ლიგაში, ბარსელონასთან სხვაობა 1 ქულამდე შემცირდა.