"ვიგრძენით, რომ ეს შანსი უნდა გამოგვეყენებინა" - არნე სლოტი მამარდაშვილის ტრანსფერზე

"ლივერპულის" მთავარი მწვრთნელის პოსტზე, არნე სლოტი ფენომენალურ სადებიუტო სეზონს ატარებს. პრემიერ ლიგის განვლილი 13 ტურის შემდეგ, მერსისაიდელები 34 ქულით სატურნირო ცხრილის სათავეში იმყოფებიან და უახლოეს მდევარს 9 ქულით უსწრებენ. რაც შეეხება ჩემპიონთა ლიგას - "ლივერპულმა" ხუთივე მატჩი მოიგო და ერთადერთი კლუბია, რომელმაც 100%-იანი შედეგი დააფიქსირა.

ტრავმების გამო "ლივერპულს" ალისონი, დიოგო ჟოტა, კოსტას ციმიკასი, კონორ ბრედლი, იბრაჰიმა კონატე და ფედერიკო კიეზა ვერ ეხმარებიან. მართალია დანაკლისის მიუხედავად კლუბი ბრწყინვალედ ასპარეზობს, მაგრამ პრემიერ ლიგის გრანდმა შესაძლოა იანვრის სატრანსფერო ფანჯრის განმავლობაში იაქტიუროს და რამდენიმე ფეხბურთელი შეიძინოს.

პოტენციური ტრანსფერების შესახებ საუბრისას, არნე სლოტმა უკვე განხორციელებული ტრანსფერებიც გაიხსენა და ყურადღება გიორგი მამარდაშვილზე გაამახვილა.

შეგახსენებთ, "ლივერპულმა" გიორგი მამარდაშვილის სანაცვლოდ 30 მილიონი ფუნტი გადაიხადა, რომელსაც სამომავლო ბონუსების სახით, შესაძლოა კიდევ რამდენიმე მილიონი დაემატოს. ქართველი კიპერი "ლივერპულს" 2025 წლის ზაფხულში შეუერთდება.