უეფამ რუმინეთის ფეხბურთის ფედერაცია დააჯარიმა, წაგება კი კოსოვოს ჩაუთვალა

უეფას სააპელაციო კომიტეტმა რუმინეთსა და კოსოვოს შორის ერთა ლიგის ჩაშლილ მატჩზე გადაწყვეტილება მიიღო.

რუმინეთის ფეხბურთის ფედერაცია ჯამში 128 ათასი ევროთი დაჯარიმდა, გარდა ამისა, ნაკრებს 1 საშინაო შეხვედრის ჩატარება ცარიელ სტადიონზე მოუწევს.

რაც შეეხება კოსოვოს, გუნდს ტექნიკური წაგება (0:3) ჩაეთვალა, ფედერაცია კი 6 ათასი ევროთი დააჯარიმეს.

რუმინეთისა და კოსოვოს მატჩის ბოლო წუთებში ფეხბურთელებს შორის შელაპარაკებას რუმინელი ფანების მხრიდან პროსერბული შეძახილები მოჰყვა. კოსოვოელებმა პროტესტის ნიშნად მოედანი დატოვეს, 1 საათის შემდეგ კი მსაჯმა შეხვედრის დასრულების გადაწყვეტილება მიიღო.

კოსოვომ სერბეთისგან დამოუკიდებლობა 2008 წელს გამოაცხადა, რასაც რუმინეთი არ აღიარებს.