"UEFA-მ უკრაინას გამარჯვება მოპარა" - ფანები ჩეფერინს აკრიტიკებენ

იტალიასთან გამართული მატჩის ბოლო წუთზე საეჭვო ვითარებაში არდანიშნული პენალტის გამო, ფანები შეთქმულების თეორიის შესახებ ალაპარაკდნენ.

ევროპის მოქმედი ჩემპიონი - იტალია სტუმრად უკრაინას დაუპირისპირდა და ფრედ (0:0) დასრულებული მატჩის შედეგად 1 ქულა მოიპოვა, რაც 2024 წლის ევროპის ჩემპიონატზე ასპარეზობის უფლების მისაღებად საკმარისი აღმოჩნდა.

საშინაო არენაზე მოპოვებული გამარჯვების (2:1) შედეგად, უკანასკნელ ტურში იტალიისთვის მთავარი იყო, რომ უკრაინასთან არ დამარცხებულიყო - სხვა ნებისმიერი შედეგი "აძურის" უმაგრებდა ზურგს. უკრაინაში მიმდინარე კონფლიქტის გამო, უკრაინისა და იტალიის საფეხბურთო მატჩი გერმანიის ქალაქ ლევერკუზენში გაიმართა და ფრედ 0:0 დასრულდა. ეს ყველაფერი იმას ნიშნავს, რომ იტალიამ 2024 წლის ევროპის ჩემპიონატის საგზური გაინაღდა - უკრაინას კი კიდევ ერთი შანსი მომავალი წლის მარტში, ერთა ლიგის პლეი-ოფში მიეცემა.

მეორე ტაიმის დამატებით დროში საკმაოდ საკამათო მომენტი შეიქმნა - მიხაილო მუდრიკი ბრაიან კრისტანდემ საჯარიმოში წააქცია და ერთი შეხედვით 100%-იანი პენალტი უნდა დანიშნულიყო, თუმცა მთავარმა მსაჯმა სხვა გადაწყვეტილება მიიღო. ესპანელმა არბიტრმა - ხესუს ჟილ მანზანომ პენალტი არ დანიშნა, VAR-მა კი არბიტრის გადაწყვეტილება არ განიხილა. სწორედ ამ გარემოებამ გამოიწვია გულშემატკივრების აღშფოთება. არდანიშნული თერთმეტმერიანის გამო, ფანებმა შეთქმულების თეორიაზე დაიწყეს საუბარი და აღნიშნეს, რომ UEFA-ს პრეზიდენტმა - ალექსანდრ ჩეფერინმა ყველაფერი გააკეთა იმისთვის, რომ იტალიას ევროპირველობის საგზური მიეღო.

ეს იმ კომენტარების არასრული ჩამონათვალია, რომელიც საფეხბურთო მიმომხილველებმა, სპორტულმა ჟურნალისტებმა და ფანებმა სოციალურ ქსელებში განათავსეს.

ფანების უკმაყოფილებას UEFA-ს პრეზიდენტის - ალექსანდრ ჩეფერინის კომენტარიც იწვევს, რომელიც ამ უკანასკნელმა მატჩამდე ცოტა ხნით ადრე, იტალიურ მედიასთან გააკეთა.