U21 | ევროპის ჩემპიონატის წილისყრის თარიღი და საქართველოს სავარაუდო მეტოქეები

საქართველოს 21-წლამდელთა ნაკრებმა ევროპის ჩემპიონატის პლეი-ოფის გადამწყვეტ შეხვედრაში ხორვატიას პენალტების სერიაში აჯობა და ტურნირის საგზური გაიფორმა.

მომავალ ევროპის ჩემპიონატზე, რომელსაც 2025 წლის 11-28 ივნისს სლოვაკეთი უმასპინძლებს, 16 ნაკრები იასპარეზებს. გუნდები კალათებში ასე გადანაწილდნენ:

I კალათი - ესპანეთი, ინგლისი, პორტუგალია, ნიდერლანდები

II კალათი - გერმანია, საფრანგეთი, უკრაინა, იტალია

III კალათი - დანია, რუმინეთი, ჩეხეთი, პოლონეთი

IV კალათი - საქართველო, სლოვენია, ფინეთი, სლოვაკეთი

წილისყრამდე, რომელიც 3 დეკემბერს ბრატისლავაში გაიმართება, ცნობილია, რომ სლოვაკეთი A ჯგუფში ითამაშებს, შესაბამისად, საქართველოს ნაკრების ამ ჯგუფში მოხვედრა გამორიცხულია.

წინა ევროპის ჩემპიონატს საქართველომ და რუმინეთმა უმასპინძლეს. ფინალური შეხვედრა ინგლისსა და ესპანეთს შორის ბათუმში გაიმართა და ინგლისელთა გამარჯვებით, ანგარიშით 1:0 დასრულდა.