ცნობილია, რა შემთხვევაში გაუშვებს რეალი ვინისიუსს არაბულ გუნდში

,,ალ აჰლი'' ვინისიუს ჟუნიორის ტრანსფერზე მუშაობას განაგრძობს. Marca-ს ინფორმაციით, არაბულმა გუნდმა წინადადებით მადრიდის ,,რეალს'' უკვე მიმართა.

როგორც ესპანურ მედიაში იწერება, ,,სამეფო კლუბის'' პოზიცია ასეთია - ბრაზილიელი გუნდს მხოლოდ იმ შემთხვევაში დატოვებს, თუ ,,ალ აჰლი'' მის სანაცვლოდ გამოსასყიდ თანხას - 1 მილიარდ ევროს გადაიხდის.

თავის მხრივ, არაბები ვინისიუსს 5-წლიან ხელშეკრულებასა და სეზონში ხელფასის სახით 250 მილიონ ევროს სთავაზობენ, რითაც ის ყველა დროის ყველაზე მაღალანზღაურებადი ფეხბურთელი გახდება. 24 წლის გარემარბის ამჟამინდელი ხელფასი 20 მილიონი ევროა.

ვინისიუსმა გასულ სეზონში ,,რეალის'' მაისურით ჩატარებულ 39 შეხვედრაში 24 გოლი გაიტანა და 11 საგოლე გადაცემა მიითვალა.