ოთარ კიტეიშვილი: "იმედი მაქვს ეს ბოლო ტრავმა იყო - მინდა, რომ კონცენტრირებული დავბრუნდე"

26 მარტს საქართველოს ნაკრების ნახევარმცველს, ოთარ კიტეიშვილს 27 წელი შეუსრულდა.

ქართველმა გამთამაშებელმა გრაცის "შტურმის" შემადგენლობაში უკვე მეხუთე დაბადების დღე აღნიშნა, რასაც კლუბის ოფიციალურმა ვებ-გვერდმა "კიტესთან" ინტერვიუ მიუძღვნა, საიდანაც გამორჩეულ ეპიზოდებს გთავაზობთ.

"დიახ, ამჟამად ჩემი მეხუთე სეზონია და რეალურად ეს ძალიან დიდი დროა. ბოლო ორწელიწადნახევრის განმავლობაში არც ისე დიდი პერიოდი გამიტარებია მოედანზე, რადგან სამწუხაროდ ტრავმა ხშირად მქონდა.

მართალია, რომ ჩვენ მუდმივად ვვითარდებით ბოლო სამი სეზონის განმავლობაში და ვძლიერდებით და ვძლიერდებით. წელს ძალიან კარგი სასტარტო პოზიცია გვაქვს ლიგასა და თასზე. სეზონის ყველაზე მნიშვნელოვანი ნაწილი მომავალ შაბათ-კვირას დაიწყება და ჩვენ ისეთი ძლიერები უნდა ვიყოთ, როგორიც არასდროს.

"ფეიენოორდის" წინააღმდეგ თამაში მართლაც წარმოუდგენელი იყო. მე სათადარიგო შემადგენლობაში ვიყავი, მოედანზე შევედი და გამარჯვების გოლი გავიტანე - ეს წარმოუდგენელი გრძნობა იყო.

დროდადრო მახსენდება ეს გოლი ან ვუყურებ და როცა ჩემს სახეს ვხედავ ვხვდები, რომ ნამდვილად ვერ გადმოვცემდი იმას, რასაც მაშინ ვგრძნობდი. როგორც წესი, უკვე ემოციური ვარ, მაგრამ სახე ვერ ასახავდა ჩემს ემოციურ მდგომარეობას. ეს თამაში და ეს გოლი ნამდვილად იყო ჩემს კარიერაში ერთ-ერთი საუკეთესო მომენტი. ზოგადად და კონკრეტულად ამ მატჩის გამო, ჯგუფური ეტაპიდან გამოვარდნის ტკივილი უზარმაზარი იყო. მიუხედავად ამისა, ძალიან კარგი ჯგუფური ეტაპი ვითამაშეთ და ამით ვამაყობთ.

მომდევნო შაბათ-კვირას სეზონის ყველაზე მნიშვნელოვანი ეტაპი იწყება. ჩვენ ვიცით, რამდენად მნიშვნელოვანი და რთული იქნება "რაპიდის" წინააღმდეგ. დარწმუნებული ვარ, გვეცოდინება და გავიგებთ, რომ ეს ბოლო ათი თამაში უაღრესად მნიშვნელოვანია და მოგვეთხოვება მოედანზე ძალების გადმოტანა. მომზადებული ვიქნებით ამ გადამწყვეტი ეტაპისთვის და იმედია ყველას დავანახებთ რამდენად კარგია ჩვენი გუნდი.

ჩემი დაბადების დღის სურვილი ტრავმების დასრულება იქნება, იმედი მაქვს ჯანმრთელი ვიქნები და ასევე მინდა ვიყო მოტივირებული და კონცენტრირებული მთელი ჩემი კარიერის განმავლობაში და ვიპოვო გზა, რომ ყოველთვის მშვიდად ვიყო საკუთარ თავთან. რა თქმა უნდა, მეც ვუსურვებ ყველაფერს საუკეთესოს ჩვენს გუნდს და თითოეულ მოთამაშეს, რათა ერთად აღვნიშნოთ წარმატება, როგორც ინდივიდუალურ ისე გუნდურ დონეზე", - თქვა ოთარ კიტეიშვილმა.

ოთარ კიტეიშვილს მიმდინარე სეზონში ყველა ტურნირზე საერთო ჯამში 17 მატჩში აქვს მონაწილეობა მიღებული, 4 გოლი აქვს გატანილი და 1 საგოლე პასი გაკეთებული.