„მეორე ადგილისთვის მედალი რატომ უნდა მინდოდეს?“ - რუნი სიტის ტიტულების ჩამორთმევაზე

უეინ რუნი მანჩესტერ სიტისთვის შესაძლო ტიტულების ჩამორთმევის თემას ეხმაურება და აცხადებს, რომ იუნაიტედისთვის პრემიერ ლიგის დამატებითი ჩემპიონობის გადაცემას არ ემხრობა. მისი თქმით, "წითელ ეშმაკებს" იმ სეზონში ჩემპიონობა არ დაუმსახურებიათ და ოქროს მედალს არცერთ შემთხვევაში არ უნდა გადაეცეთ.

შეგახსენებთ მანჩესტერ სიტის გარშემო გამოძიება მას შემდეგ დაიწყო, რაც პრემიერ ლიგამ კლუბს 2009-2018 წლებში ფინანსური წესების სავარაუდო დარღვევის გამო 115 ბრალდება წაუყენა. საქმე ეხება სპონსორებისგან მიღებული შემოსავლების ხელოვნურად გაზრდას, მწვრთნელებისა და ფეხბურთელების ხელფასების ფარულად გადახდასა და არაზუსტი ფინანსური ანგარიშგების წარდგენას. სიტი ბრალდებებს უარყოფს, თუმცა დამნაშავედ ცნობის შემთხვევაში კლუბს მსხვილი ფინანსური ჯარიმა, ქულების დაკლება ან პრემიერ ლიგიდან დაქვეითებაც კი ემუქრება.