მამარდაშვილი ევრო 2024-ის სიმბოლურ გუნდში არაა | რატომ მენიო და არა მამარდა?!
ქართველი გულშემატკივარის სამართლიანი მოლოდინი არ გამართლდა: UEFA-ს მიერ გამოქვეყნებულ, ევრო 2024-ის საუკეთესო გუნდში, კარში მამარდაშვილის ნაცვლად მაიკ მენიო დგას. ეროვნული მოტივები, ქვეყნის სიყვარული და პატრიოტიზმი რომ გვერდით გადავდოთ და ცივი გონებით შევხედოთ, მაინც ისმის კითხვა: რატომ მენიო და არა მამარდაშვილი?!
შედარებითი, სტატისტიკური ანალიზით დავიწყოთ: ევრო 2024-ზე, მამარდაშვილმა ჩაატარა 4 მატჩი, სადაც 29 ბურთი მოიგერია (საშუალოდ, 7.25 სეივი). საფრანგეთის კარის დარაჯმა, მენიომ, ძირითად შემადგენლობაში 6-ჯერ ითამაშა, სადაც 16 სეივს მოუყარა თავი (2.66 საშუალოდ).
საფრანგეთის ნაკრები თამაშობდა შემტევ ფეხბურთს და ტურნირზე, მეტოქის კარისკენ დარტყმებში მე-2 ადგილი დაიკავა. საქართველოს ნაკრები თამაშობდა დაცვით ფეხბურთს და სახიფათო მომენტის განმუხტვის კომპონენტში (მაგალითად, ბურთის საჯარიმოდან გამოტანა), მე-2 პოზიციაზეა წარმოდგენილი. უდავო ფაქტია, რომ ამ გარემოებაში, მამარდაშვილის ჩართულობა გაცილებით ხშირი უნდა ყოფილიყო. შესაბამისად, შეგვიძლია ვთქვათ, რომ საქართველოს მერვედფინალში გასვლაში, მამარდაშვილის წვლილი უფრო წონიანი იყო.
ამას დავუმატოთ შემდეგი ფაქტი: მამარდას ჰქონდა ისეთი ინდივიდუალური მიღწევა, რომელიც ისტორიას ძალიან დიდი ხნის განმავლობაში შემორჩება. ევროპის ჩემპიონატის ისტორიაში, 1 ტურნირზე, ყველაზე მეტი სეივი (32) შეასრულა რუსმა იგორ აკინფეევმა (2008-ში), 5 მატჩი ჩაატარა (6.4 სეივი საშუალოდ). 2000 წელს, 30 სეივი ჰქონდა ფრანჩესკო ტოლდოს საშ. 5 სეივი) - იმ სეზონში, იტალიამ ფინალში ითამაშა და მეორე დამატებით ტაიმში ტრეზეგეს ოქროს ბურთით დამარცხდა.
მესამე ადგილზეა მამარდაშვილი. კიდევ ერთხელ, ხაზგასმით აღვნიშნოთ - მამარდამ 4 მატჩში 29 სეივი შეასრულა (7.25 საშუალოდ). 1992-ში, 27 ჰქონდა ლეგენდარულ პიტერ შმეიხელს, როდესაც დანიამ სენსაცია მოახდინა და იუგოსლავიის ნაცვლად, ევროპის ჩემპიონატის ჯგუფურ ეტაპზე ჩამატებულმა, ტურნირი მოიგო.
შესაბამისად, 1 მატჩში საშუალო სეივების რაოდენობით, მამარდაშვილს თითოეულ მათგანზე უკეთესი მაჩვენებელი აქვს.
მენიოს გაშვებული გოლები
6 შეხვედრიდან, მენიომ კარი მშრალად 4-ჯერ შეინახა. მის გაშვებულ 3 გოლს შეგახსენებთ.
![](https://fcdn.belive.ge/livege/media/82918/Screenshot-2024-07-16-at-18-28-42.png)
![](https://fcdn.belive.ge/livege/media/82919/Screenshot-2024-07-16-at-19-12-52.png)
![](https://fcdn.belive.ge/livege/media/82920/Screenshot-2024-07-16-at-19-14-01.png)
გაშვებულ გოლებში, მენიოს ვერავინ დაადანაშაულებდა და არასამართლიანი იქნება იმის მტკიცება, რომ ფრანგი მეკარე ამ ევროპის ჩემპიონატზე გამორჩეული არ იყო. მეორე მხრივ, მამარდაშვილის შეცდომებზეც ვერ ვისაუბრებთ. კონკრეტულ მაგალითებს გავუყვეთ:
მამარდაშვილი Vs. თურქეთი
თურქეთთან მამარდაშვილმა 3 გოლი გაუშვა. ორი მათგანი იყო ისევე აუღებელი, როგორიც იამალის გოლი საფრანგეთის ნაკრებთან. მესამე გოლის დროს კი, მამარდაშვილი კარში საერთოდ არ იდგა, რაც არა მისი, არამედ ვილი სანიოლის გადაწყვეტილება გახლდათ.
![](https://fcdn.belive.ge/livege/media/82921/Screenshot-2024-07-16-at-19-18-14.png)
![](https://fcdn.belive.ge/livege/media/82922/Screenshot-2024-07-16-at-19-23-05.png)
![](https://fcdn.belive.ge/livege/media/82923/Screenshot-2024-07-16-at-19-23-40.png)
მამარდაშვილი Vs. ჩეხეთი
მამარდაშვილის მეოთხე გაშვებული გოლი ალბათ კარგად გახსოვთ: ჩეხ თავდამსხმელს, პატრიკ შიკს, ძელიდან ასხლეტილი ბურთი, კარის ხაზიდან 1 მეტრში მოხვდა. ეს არ ყოფილა მამარდაშვილის პოზიციური შეცდომა - უიღბლობა იყო.
![](https://fcdn.belive.ge/livege/media/82924/Screenshot-2024-07-16-at-19-37-12.png)
მამარდაშვილი Vs. პორტუგალია და ესპანეთი
პორტუგალიასთან მატჩში, მამარდაშვილი შეუდარებელი გახლდათ, თუმცა აქ მის გაშვებულ გოლებზე ვსაუბრობთ - პორტუგალიელებთან კი "ვალენსიას" კარის დარაჯმა კარი მშრალად შეინახა. მერვედფინალში სენსაციურად გასვლის შემდეგ, საქართველოს, ტურნირის გამარჯვებული, ესპანეთი ელოდებოდა.
ესპანეთისგან 4 გოლი მივიღეთ. ყველაზე კონტრავერსიული გახლდათ პირველი გოლი, რომელიც VAR-ზე არ გადაიხედა. არადა, გამეორებაზე კარგად ჩანს, რომ თამაშგარის ზონაში მყოფი მორატა მამარდაშვილს ეფარებოდა და შესაბამისად, მომენტზე გავლენას ახდენდა.
![](https://fcdn.belive.ge/livege/media/82926/Screenshot-2024-07-16-at-19-49-42.png)
![](https://fcdn.belive.ge/livege/media/82927/Screenshot-2024-07-16-at-19-51-51.png)
![](https://fcdn.belive.ge/livege/media/82928/Screenshot-2024-07-16-at-19-53-11.png)
![](https://fcdn.belive.ge/livege/media/82929/Screenshot-2024-07-16-at-19-55-33.png)
დასკვნა
უდავო ფაქტია, რომ მენიო იყო დამაჯერებელი ევროპის ჩემპიონატზე, მამარდაშვილი კი - გამორჩეული. მენიოს საშუალო შეფასება Euro 2004-ზე, Whoscored.com-ის მიხედვით, 6.98-ს შეადგენდა, მამარდაშვილი საშუალო შეფასება კი 7.76 გახლდათ (განსაკუთრებით აღსანიშნავია ჩეხეთთან 9.25). ჩეხეთის ნაკრებთან, მამარდას პერფორმანსზეც ლოთარ მათეუსმა შემდეგი სიტყვები თქვა: "ბაიერნში", მანუელ ნოიერის ღირსეული შემცვლელი იქნებოდაო.
შესაბამისად, გადაწყვეტილება, რომელიც UEFA-ს ტექნიკური დამკვირვებლების ჯგუფმა მიიღო, უფრო შორეულ ეტაპზე გასული გუნდისა და ნაკლები გაშვებული გოლის სასარგებლოდ იქნა მიღებული. სხვა ფაქტორების გათვალისწინებით, მამარდაშვილი Vs. მენიოს დუელში, ევრო 2024-ზე, ცალსახა ფავორიტი ქართველი მეკარე უნდა ყოფილიყო.
ევრო 2024-ის საუკეთესო გუნდი - ვინ შეარჩია ფეხბურთელები?
UEFA-ს ოფიციალური გუნდი ასეთია:
მეკარე: მაიკ მენიო;
მცველები: კაილ უოკერი, უილიამ სალიბა, მანუელ აკანჯი, მარკ კუკურელია;
ნახევარმცველები: როდრი, დანი ოლმო, ფაბიან რუისი;
თავდამსხმელები: ლამინე იამალი, ჯამალ მუსიალა, ნიკო უილიამსი.
ამ შემადგენლობის შერჩევაზე, UEFA-ს ტექნიკური დამკვირვებლების ჯგუფმა იმუშავა, რომლის შემადგენლობაშიც შედიოდნენ:
ფაბიო კაპელო (ლეგენდარული იტალიელი მწვრთნელი);
იოან ლუპესკუ (ყოფილი რუმინელი ფეხბურთელი);
მაიკლ ო'ნილი (ჩრდ. ირლანდიის ნაკრების მთავარი მწვრთნელი);
დევიდ მოიესი (ბრიტანელი მწვრთნელი, რომელსაც ევერტონში, მანჩესტერსა და სხვა ინგლისურ კლუბებში აქვს ნამუშევარი);
ალიოშა ასანოვიჩი (ხორვატი ყოფილი ფეხბურთელი. ბოლოს ზამბიის ნაკრებს ხელმძღვანელობდა);
რაფაელ ბენიტესი (ლივერპულთან ერთად, ჩემპიონთა ლიგის მომგები მწვრთნელი);
ავრამ გრანტი (ისრაელელი სპეციალისტი, წარსულში "ჩელსის" მწვრთნელი, ახლა ზამბიის ნაკრები აქვს ჩაბარებული);
პაკი ბონერი (ირლანდიელი ყოფილი ფეხბურთელი);
ფრანკ დე ბური (ნიდერლანდების ნაკრების ლეგენდა);
ოლე გუნარ სულშერი (ნორვეგიის ნაკრების ყოფილი ფორვარდი, მანჩესტერ იუნაიტედის ერთ-ერთი ლეგენდა და ყოფილი მწვრთნელი);
აიტორ კარანკა (მადრიდის "რეალთან" ერთად, ჩემპიონთა ლიგის 3-გზის გამარჯვებული);
ჟან-ფრანსუა დომერგი (საფრანგეთის ნაკრების ყოფილი მცველი, ევრო 84-ის გამარჯვებული).