მადრიდის რეალი სტადიონს სახელს უცვლის

მადრიდის ,,რეალმა'' გადაწყვიტა, რომ ,,სანტიაგო ბერნაბეუს'' სახელი შეუცვალოს. ინფორმაციას მარკა ავრცელებს.

გამოცემის ცნობით, სტადიონის სახელწოდებაში მხოლოდ ,,ბერნაბეუ'' დარჩება. როგორც მარკა წერს, კლუბმა ასეთი გადაწყვეტილება მარკეტინგული და კომერციული ხელშეკრულების გამო მიიღო. ინფორმაცია ოფიციალურად მალე დადასტურდება.

ცვლილება ჯერჯერობით მხოლოდ რამდენიმე დეტალში აისახა, მაგალითისთვის, სტადიონის ოფიციალურ ვებგვერდს bernabeu.realmadrid.com ჰქვია, ასეთივე სახელწოდება აქვს სტადიონის ინსტაგრამ გვერდს. ბერნაბეუ აწერია არენის მინიატურულ მოდელსაც, რომელიც ,,სამეფო კლუბის'' საიტზე იყიდება.

ლა ლიგის 18 ტურის შემდეგ, ,,რეალი'' 40 ქულით სატურნირო ცხრილის მე-2 პოზიციაზეა და ლიდერ ,,ატლეტიკოს'' 1 ქულით ჩამორჩება. ანჩელოტის გუნდი მომავალ მატჩს შაბათს, 4 იანვარს, ,,ვალენსიას'' წინააღმდეგ გამართავს.