ლივერპულის ფანებს სურთ, რომ ლეგენდების მატჩში გუნდის მწვრთნელი სვენ-გორან ერიქსონი იყოს

,,ლივერპულის'' ფანებმა წამოიწყეს კამპანია, რომლის ფარგლებშიც კლუბის ხელმძღვანელობას მოუწოდებენ, რომ მარტში, ,,აიაქსის'' ლეგენდებთან შეხვედრაში, მათ გუნდს სვენ-გორან ერიქსონმა უთავკაცოს.

შვედმა სპეციალისტმა რამდენიმე დღის წინ განაცხადა, რომ სიმსივნის გამო სულ ერთი წლის სიცოცხლე დარჩა. მან ასევე თქვა, რომ მთელი ცხოვრება ,,ლივერპულს'' გულშემატკივრობდა და ყოველთვის უნდოდა, ,,მერსისაიდელთა'' მწვრთნელი ყოფილიყო.

ინგლისური გუნდის გულშემატკივრების კამპანიას დღეს სპეციალისტი თავად გამოეხმაურა და დასმულ შეკითხვას, უხელმძღვანელებდა თუ არა ,,ლივერპულს ლეგენდების მატჩში, უპასუხა: ,,რა თქმა უნდა... ეს ხომ ჩემი ოცნებაა!''

,,ლივერპულისა'' და ,,აიაქსის'' ლეგენდების შეხვედრა 23 მარტს, ,,ენფილდზე'' გაიმართება.