ხაბი ალონსო: "მოვიგეთ, მაგრამ მეტი უნდა გაგვეტანა"

ესპანეთის ლა ლიგაში სეზონის პირველი 'ელ კლასიკო' შედგა. მეათე ტურში, 'სანტიაგო ბერნაბეუზე' რეალმა ბარსელონა მიიღო და 2:1 დაამარცხა. მბაპესა და ბელინგემის გოლებს ფერმინ ლოპესმა უპასუხა - შედეგი ზუსტად არ ასახავს იმას, თუ როგორ აკონტროლებდნენ მასპინძლები მატჩის მიმდინარეობას. რეალს გაცილებით დიდი ანგარიშით მოგებაც შეეძლო, რაც ხაბი ალონსომ პრესკონფერენციაზეც აღნიშნა.

წინა სეზონში, ბარსელონამ რეალს ოთხივე ელ კლასიკო მოუგო, ამიტომ 'სამეფო კლუბისთვის' და პირადად ალონსოსთვის, ამ მატჩს დიდი მნიშვნელობა ჰქონდა. შეხვედრას წინ უძღოდა დაძაბულობაც, რაც ლამინე იამალის უხეშმა რეპლიკებმა გამოიწვია - მატჩის დასრულების შემდეგ ამ ამბავს გაგრძელება და მცირე კონფლიქტებიც მოჰყვა.

მე-10 ტურის შემდეგ, რეალი ცხრილის პირველ ადგილზეა და ბარსელონას 5 ქულით უსწრებს.