ხაბი ალონსო: "ბაიერნს საგოლე შანსი თითქმის არ ჰქონია"

ბუნდესლიგის 21-ე ტურში ლევერკუზენის "ბაიერმა" მიუნხენის "ბაიერნის" წინააღმდეგ ბრწყინვალე გამარჯვება მოიპოვა და კიდევ ერთხელ დაამტკიცა, რომ ხაბი ალონსოს გაწვრთნილი გუნდი შედეგობრივიდაც და თამაშის ხარისხითაც წარმოუდგენელ ფეხბურთს აჩვენებს და ეს მოცემულობაა და არა კონტექსტიდან ამოგლეჯილი ნაწყვეტი.

იოსიპ სტანისიჩის, ალეხანდრო გრიმალდოსა და ჯერემი ფრიმპონგის გოლებმა BayArena-ზე შეკრებილ მაყურებელს დაუვიწყარი საღამო აჩუქა. გარდა გოლებისა ბაიერს უამრავი მომენტი ჰქონდა, მაშინ როდესაც ტუხელის ბაიერნმა კარის ჩარჩოში მხოლოდ ერთხელ დაარტყა, ეს რეკორდმაისტერის ყველაზე ცუდი შედეგია ბოლო 8 წლის განმავლობაში, ბუნდესლიგაში ჩატარებულ თამაშებში.

ლევერკუზენმა ამ მოგებით 21 ტურში 55 ქულა დააგროვა და უშუალო მდევარს, მიუნხენის ბაიენრს უკვე 5 ქულით გაუსწრო. აღსანიშნავია, რომ ალონსოს გუნდში დანიშნვნის შემდეგ ლევერკუზენს ბაიერნთან არ წაუგია (2 მოგება და 1 ფრე).