იტალიის ფეხბურთის ფედერაციამ გვარდიოლასთან მოლაპარაკებები დაადასტურა

მთავარი მწვრთნელის ძიებაში მყოფი იტალიის ეროვნული ნაკრები პეპ გვარდიოლას კანდიდატურას განიხილავს. იტალიის ფეხბურთის ფედერაციის პრეზიდენტმა, ესპანელ სპეციალისტთან მოლაპარაკებების ფაქტი დაადასტურა, თუმცა შეთანხმების მიღწევის შანსებთან დაკავშირებით სიფრთხილეს ინარჩუნებს.

პეპ გვარდიოლას „სკუადრა აძურას“ სათავეში ჩადგომის პერსპექტივა ისეთი რეალურია, როგორც არასდროს. ჯოვანი მალაგომ, გადაცემა „Vivavoce“-ში დაადასტურა, რომ 55 წლის ესპანელ ტაქტიკოსთან დიალოგი უკვე მიმდინარეობს. ეს პოსტი მას შემდეგ დარჩა ვაკანტური, რაც აპრილში, მსოფლიო ჩემპიონატის საგზურის დაკარგვის შემდეგ, გუნდი ჯენარო გატუზომ დატოვა.

FIGC-ის ახლად არჩეულმა პრეზიდენტმა, მალაგომ, ბოლო დღეებში მთავარი მწვრთნელის საკითხის მოგვარება აქტიურად დაიწყო. ეს საკმაოდ სენსიტიური თემაა, რადგან იტალიური ფეხბურთი უკვე წლებია სტაბილურობასა და სასურველ შედეგებს ამაოდ ეძებს.

მალაგომ ასევე დაადასტურა, რომ პოტენციურ კანდიდატთა შორის იტალიის ნაკრების ყოფილი თავკაცი რობერტო მანჩინი (2018-2023) და ანდრეა პირლოც ფიგურირებენ, თუმცა დასძინა, რომ სიაში სხვა ცნობილი გვარებიც შედიან.