ჰაიდუკი უკეთესი იყო | როგორ დასრულდა დინამო თბილისის სავარაუდო მეტოქეების პირველი მატჩი?

ევროპა ლიგის მე-2 საკვალიფიკაციო ეტაპის პირველ შეხვედრაში ჰაიდუკ სპლიტმა პაფოსს უმასპინძლა და 2:0 დაამარცხა.

მატჩში ორივე გოლი მეორე ტაიმში გავიდა - 56-ე წუთზე მიკელე შეგომ საჯარიმო დარტყმა ბრწყინვალედ შეასრულა, მალევე კი დარიო მელნიაკმა საბოლოო ანგარიში დააფიქსია.

ეს დაპირისპირება განსაკუთრებით საინტერესოა ქართველი გულშემატკივრებისთვის, რადგან იმ შემთხვევაში თუ დინამო თბილისი ჟალგირისის (კონფერენს ლიგის მე-2 საკვალიფიკაციო ეტაპი) ბარიერს დაძლევს, მისი მომავალი მეტოქე სწორედ ამ წყვილში დამარცხებული იქნება. თანაც, დინამოს მომდევნო ეტაპზე გასვლისთვის უდიდესი ნაბიჯი აქვს გადადგმული - თემურ ქეცბაიას გუნდმა გუშინ 3:0 იმარჯვა.

დინამოსა და ჟალგირისის საპასუხო მატჩი მომავალ ხუთშაბათს, 30 ივლისს, ვილნიუსში გაიმართება, ამავე დღეს გამოვლინდება ქართული კლუბის მეტოქეც. ორივე შეხვედრა 21:00 საათზეა ჩანიშნული.