"გამაგრდი გიორგი" - შვილის ავადმყოფობის გამო კოპენჰაგენის ფანებმა ქართველი მცველი გაამხნევეს

საფეხბურთო კლუბმა "კოპენჰაგენმა" ოფიციალურად დაადასტურა, რომ გიორგი გოჩოლეიშვილის შვილი ავადაა. კლუბი ასევე აღნიშნავს, რომ ქართველი ვარსკვლავის ოჯახი ჰოსპიტალიზებულია და გიორგის შვილი მკურნალობის კურსს წამყვანი სპეციალისტების მეთვალყურეობით გადის.

მიუხედავად ოჯახში არსებული მძიმე ვითარებისა, 23 წლის გოჩოლეიშვილმა საკუთარ თავში გამონახა ძალები და მოედანზე "კოპენჰაგენისთვის" თავდაუზოგავად იბრძვის - გამონაკლისი არც 4 ნოემბერს, "სილკებორგის" წინააღმდეგ გამართული მატჩი (2:2) აღმოჩნდა, სადაც გოჩოლეიშვილი მატჩის საუკეთესო მოთამაშედ დაასახელეს.

გიორგი გოჩოლეიშვილის მხარდასაჭერად, "კოპენჰაგენის ფანებმა ტრიბუნებზე სპეციალური ბანერი გამოფინეს, სადაც გიორგი გოჩოლეიშვილსა და მის ოჯახს თანადგომა გამოუცხადეს.

მოედანზე გამოვლენილმა თავგანწირვამ "კოპენჰაგენის" მთავარი მწვრთნელი აღაფრთოვანა და იაკობ ნეესტრუპმა გუნდის გარშემო ყველას მოუწოდა, რომ გააკეთონ ყველაფერი იმ ფეხბურთელის მხარდასაჭერად, რომელიც წარმოუდგენლად რთულ სიტუაციაშია.

გიორგი გოჩოლეიშვილის გამხსნევებას თანაგუნდელებიც ცდილობენ. ტომას დელანი ერთ-ერთი პირველია, ვინც კომენტარი გააკეთა და ქართველ მცველს თანადგომა გამოუცხადა.

შეგახსენებთ, გიორგი გოჩოლეიშვილი "კოპენჰაგენს" საიჯარო ხელშეკრულებით შეუერთდა. "კოპენჰაგენსა" და "შახტარს" შორის გაფორმებული ხელშეკრულებით, დანიურ კლუბს ქართველი მცველის გამოსყიდვის უფლება აქვს.

"კოპენჰაგენის" ოფიციალური განცხადებით, კლუბი გიორგი გოჩოლეიშვილის მიმართ განსაკუთრებულ მზრუნველობას გამოიჩენს და ამ დროის განმავლობაში, გოჩოლეიშვილმა შესაძლოა სავარჯიშო პროცესი და მატჩებიც გამოტოვოს.

სპორტულ მედია პორტალ belive-ს გუნდი, გიორგი გოჩოლეიშვილსა და მის ოჯახს თანადგომას ვუცხადებთ და ვიმედოვნებთ, რომ გიორგის შვილის ჯანმრთელობის მდგომარეობა უმოკლეს დროში გაუმჯობესდება.