ფავორიტებმა ვერ მოიგეს | როგორ დასრულდა იბერიას სავარაუდო მეტოქეების პირველი მატჩები?

გუშინ ევროპა ლიგის მე-3 საკვალიფიკაციო ეტაპის პირველი შეხვედრები გაიმართა.

ქართველი გულშემატკივრისთვის განსაკუთრებით საინტერესო იაგელონია - რეინჯერსისა და ლინკოლნი - ომონიას დაპირისპირებები იყო. იმ შემთხვევაში თუ იბერია ლარნეს (ევროპა ლიგის მე-3 საკვალიფიკაციო ეტაპი) ბარიერს დაძლევს, პლეი-ოფში მისი მომავალი მეტოქე იაგელონიასა და რეინჯერსის წყვილში გამარჯვებული იქნება. ლარნესთან წაგებისა და კონფერენს ლიგის პლეი-ოფში გადასვლის შემთხვევაში კი, ქართულ გუნდს ლინკოლნსა და ომონიას შორის დამარცხებული ელის.

შეიძლება ითქვას, რომ ამ მატჩებში ფავორიტებმა მოლოდინები ვერ გაამართლეს - უპირატესობის მიუხედავად, კვიპროსულმა ომონიამ გიბრალტარში ლინკოლთან ფრედ ითამაშა და თანაც, თამაშის გადარჩენა 93-ე წუთზე გატანილი გოლით შეძლო.

რაც შეეხება მეორე წყვილს, რეინჯერსი იაგელონიასთან სტუმრად 1:2 დამარცხდა. სამივე გოლი პირველ ტაიმში გავიდა, საიდანაც ორი ავტოგოლი იყო. შოტლანდიელებს მე-2 ტაიმში რამდენიმე მომენტი ჰქონდათ, თუმცა, საბოლოოდ, გამარჯვება მაინც მასპინძლებს დარჩათ.

იბერიასა და ლარნეს დაპირისპირება სამშაბათს, 11 აგვისტოს, თბილისში გაიმართება. ქართული კლუბის მომავალი მეტოქე კი მომავალ ხუთშაბათს, 13 აგვისტოს გამოვლინდება.