ევროპული ქვეყნები მსოფლიო ჩემპიონატის ბოიკოტს განიხილავენ

Sky News-ის ინფორმაციით, ევროპული საფეხბურთო ერები მსოფლიო ჩემპიონატის ბოიკოტირების შესაძლებლობას განიხილავენ, თუ FIFA-ს პრეზიდენტი, ჯანი ინფანტინო, ორგანიზაციის ნაწილის კერძო ინვესტორებზე გაყიდვის გეგმას არ გადათქვამს.

წყაროს ცნობით, UEFA-ს წევრი ქვეყნები ამ კვირაში ონლაინ რეჟიმში საგანგებო შეხვედრას გამართავენ, რათა FIFA-ს მიერ გარე ინვესტიციებით ახალი კომერციული კომპანიის დაფუძნების წინააღმდეგ ერთიანი პოზიცია ჩამოაყალიბონ.

რა არის ინფანტინოს გეგმა?

ინფანტინოს სურს 20 მილიარდად შეფასებული შვილობილი კომპანიის დაფუძნება და „FIFA Forward Enterprise“-ის 20%-ზე მეტი წილის გასხვისება 4.2 მილიარდის ინვესტიციის მოსაზიდად.

როგორც ირკვევა, ინგლისის ფეხბურთის ასოციაციისთვის (FA) FIFA-ს სამშაბათის ნაჩქარევ განცხადებამდე ამ გეგმების შესახებ არაფერი იყო ცნობილი. მეტიც, მსოფლიო ჩემპიონატის ფინალის წინ, ნიუ-იორკში ეროვნულ ასოციაციებთან გამართულ ოფიციალურ შეხვედრებზე, FIFA-ს ეს სტრატეგიული ინიციატივა საერთოდ არ წამოუჭრია. მოვლენების ასეთმა განვითარებამ და პროცესის ფარულობამ UEFA-ს ხელმძღვანელობაში ინფანტინოს მართვის სტილის გამო უკმაყოფილების ახალი ტალღა გამოიწვია

ცნობისთვის, უახლოესი მსოფლიო პირველობა ქალთა ტურნირია, რომელსაც მომავალ წელს ბრაზილია უმასპინძლებს.

მსგავსი პრეცედენტი 2021 წელსაც მოხდა, როდესაც FIFA იძულებული გახდა უარი ეთქვა მსოფლიო ჩემპიონატის ორ წელიწადში ერთხელ ჩატარების იდეაზე - მას შემდეგ, რაც UEFA-ს პრეზიდენტმა ალექსანდერ ჩეფერინიმ პირდაპირ განაცხადა, რომ ევროპული ნაკრებები ამ ტურნირში მონაწილეობას არ მიიღებდნენ.