"ძალიან მომენატრები, მაგრამ ყოველთვის იარსებებ" | ლეო მესი მამას ემშვიდობება
5 საათის წინ
ფეხბურთი
1 წთ
მსოფლიოს ყველა დროის ერთ-ერთი საუკეთესო ფეხბურთელი, ლიონელ მესი, გარდაცვლილ მამას სოციალურ ქსელში გამოქვეყნებული წერილით ემშვიდობება.
"მამა, ჯერ კიდევ არ მჯერა, რომ წახვედი. ვერ ვაცნობიერებ, ან უფრო სწორად, არ მინდა, რომ გავაცნობიერო. ძალიან მიჭირს წარმოდგენა, რომ აღარასოდეს გნახავ, რომ აღარ ვილაპარაკებთ. ვიცი, რომ იტანჯებოდი და ასე უკეთესია, მაგრამ ძალიან ადრე წახვედი. კიდევ ბევრი რამ გვქონდა ერთად მოსასწრები.
ამდენს მთხოვდი, რომ ბოლო მსოფლიო ჩემპიონატზე მეთამაშა და დაწყებამდე რამდენიმე დღით ადრე მდგომარეობა კიდევ უფრო დაგიმძიმდა. ეს პირველი შემთხვევა იყო, როცა ტურნირზე არ იქნებოდი, მაგრამ დედა მეუბნებოდა, რომ უკეთ გახდებოდი და კარგად იქნებოდი, რომ წამოსულიყავი. გეუბნებოდი, რომ ფინალამდე მივიდოდით, რათა წამოსვლა შეგძლებოდა.
ყოველ ჯერზე, როცა მატჩი მთავრდებოდა, შენს შეტყობინებას ველოდი და მენატრებოდა. სწორედ მაშინ მივხვდი, რომ სიტუაცია მართლაც ცუდი იყო. მიუხედავად ამისა, არ ვჩერდებოდი და ვფიქრობდი, რომ რაც შეიძლება შორს გავსულიყავი, რათა დრო მომეგო და ერთი თამაში მაინც გენახა. ფინალამდე მივედით და ვერ დაესწარი. მინდოდა მომეგო, რომ წამომეღო და ახალი თასი მეჩვენებინა. ვერ შევძელი, ფეხები აღარ მემორჩილებოდა. ამჯერად ვეცადე ფიზიკური შესაძლებლობებისთვის მეჯობნა, მაგრამ ვერ შევძელი. თავს კარგად ვერასოდეს ვგრძნობდი.
როცა ჩამოვედი, გეგონა, რომ ფინალი პენალტებით წავაგეთ. ვერაფერზე ვისაუბრეთ იმ ყველაფრიდან, რაც მოხდა, ვერაფრით ისიამოვნე. ჩემპიონები ვერ გავხდით, მაგრამ წარმოდგენა არ გაქვს, როგორ ვისიამოვნეთ თითოეული მატჩით. კიდევ ერთხელ, მართალი იყავი: უნდა ვყოფილიყავი და მეთამაშა.
ამას იმიტომ გიყვები, რომ ერთადერთი ეს იყო, რაზეც ვერ ვისაუბრეთ, რადგან დანარჩენი ყველაფერი ისედაც იცი. ყოველდღე ვლაპარაკობდით, ჩემი საქმეების გამო, როცა ხერხდებოდა, მაშინ ვხვდებოდით.
არ ვიცი, უშენოდ რა მეშველება, არ ვიცი, როგორ გავაგრძელო. მე უბრალოდ ფეხბურთს ვთამაშობდი და ახლა საკმაოდ მეპარება ეჭვი, რომ ამას კიდევ დიდი ხნის განმავლობაში გავაგრძელებ. პირველივე დღიდან გვერდით მედექი, ბოლომდე ძალიან ცოტა გვაკლდა. რატომ არ გაუძელი კიდევ ცოტა ხანს და ერთად არ დავასრულეთ?
ვიცი, შენი ბედნიერება შენი ოჯახის, შენი ცოლის, შენი შვილების კარგად ყოფნა იყო და განსაკუთრებით, ჩემი თამაშის ყურება...
პატარაობიდანვე სულ ასე იყო. სამსახურიდან მოსული მწვრთნელებთან, ყველგან თან დამყვებოდი. ბევრ ადგილას დედას დავყავდი, რადგან შენ მუშაობდი.
ცხადია, არცერთ მატჩს არ აცდენდი. როგორ იტანჯებოდი ჩემი ყურებით და როგორ სიამოვნებას იღებდი, მიუხედავად იმისა, რომ დიდად არასდროს მაქებდი.
იყავი მამა, მეგობარი და აგენტი. ყოველთვის ისეთი ადამიანი იყავი, როგორიც საჭირო იყო ყოველ მომენტში და არასოდეს შეგშლია არაფერი. მიუხედავად ზოგიერთი საყვედურისა თუ კამათისა, ყოველთვის მართალი იყავი. ბოლოს ისე ხდებოდა, როგორც ამბობდი.
ძალიან მომენატრები, მაგრამ ყოველთვის იარსებებ, განსაკუთრებით ჩემი შვილების აღზრდაში, რადგან მათ ისევე ვასწავლი და ვზრდი, როგორც თქვენ გამზარდეთ მე.
მშვიდად განისვენე და ზემოდან გვიდარაჯე, როგორც ამას აქ აკეთებდი. მადლობა ყველაფრისთვის. მიყვარხარ, მამა", - წერს ლეო მესი.
8 ოქროს ბურთის მფლობელის მამა ხანგრძლივი ავადმყოფობის შემდეგ, რამდენიმე დღის წინ გარდაიცვალა. ლეო მესიმ კარიერა გაურკვეველი ვადით შეაჩერა.
სხვა სტატიები
