ბრაჰიმ დიასის პრესკონფერენცია ჟურნალისტების ჩხუბის გამო შეწყდა

საფრანგეთისა და მაროკოს ნაკრებთა მატჩისწინა პრესკონფერენცია არეულობამ მოიცვა, რის გამოც მედიის ორი წარმომადგენლის განცალკევება გახდა საჭირო. მადრიდის რეალის ვარსკვლავი, ბრაჰიმ დიასი, ჟურნალისტების წინაშე ხუთშაბათს, ბოსტონში გამართულ მეოთხედფინალურ შეხვედრამდე წარსდგა.

უკანა რიგში მყოფ ჟურნალისტებს შორის დაწყებულმა სიტყვიერმა შელაპარაკებამ ფეხბურთელი საგონებელში ჩააგდო და აიძულა გაჩუმებულიყო. დამსწრე საზოგადოებამ დაპირისპირებულ მხარეებს სიმშვიდისკენ მოუწოდა, რის შემდეგაც ვითარებაში მაროკოს ნაკრებისა და ფიფას (FIFA) პრესსამსახურის ხელმძღვანელები ჩაერივნენ.

ინციდენტის ამოწურვის შემდეგ, დიასს გამოსვლის გაგრძელების უფლება მისცეს, რაზეც მან იუმორისტულად უპასუხა: „კითხვა დამავიწყდა“

კომენტარები მსაჯების შესახებ

საფრანგეთის ნაკრების მთავარმა მწვრთნელმა, დიდიე დეშამმა, სცადა შეემსუბუქებინა იმ ფაქტის მნიშვნელობა, რომ მეოთხედფინალურ მატჩს მთლიანად არგენტინული მსაჯთა ბრიგადა გაუძღვება - „ამ რეალობას უნდა შევეგუოთ. მე ვენდობი მსაჯებს. ჩვენი მეტოქე მაროკოა და არა არბიტრი".

მაროკოს ნაკრების მთავარმა მწვრთნელმა, მოჰამედ უაჰბიმ კი აღნიშნა: „რაც შეეხება ხვალინდელი მატჩის არბიტრებს, საქმე ძალიან გამოცდილ მსაჯთან გვაქვს. ჩვენ სწორედ ეს გვსურს, ასეთი დონის შეხვედრებს გამოცდილი მსაჯები უძღვებოდნენ. ასე რომ, სრულიად მშვიდად ვართ“.