ბენზემა ალ ჰილალიდან გარბის - ტრანსფერს საუდის არაბეთის ხელისუფლება ბლოკავს

38 წლის ფრანგი თავდამსხმელი და ოქროს ბურთის მფლობელი - კარიმ ბენზემა ალ-ჰილალის დატოვებას ცდილობს, თუმცა საუდის პრო ლიგაში მისი ხმაურიანი კარიერა სერიოზულ დაბრკოლებას წააწყდა. გავრცელებული ინფორმაციით, სარფიანი კონტრაქტის გაწყვეტა ბევრად უფრო რთული პროცესი აღმოჩნდა, ვიდრე უბრალოდ კლუბსა და მოთამაშეს შორის შეთანხმება.

Sky Sports-ის ინფორმაციით, ბენზემა აქტიურად იბრძვის ალ ჰილალთან ხელშეკრულების გაწყვეტისთვის, რათა საკუთარ კარიერაზე კონტროლი დაიბრუნოს. ვეტერან ფორვარდს სურს, გახდეს თავისუფალი აგენტი, რაც საშუალებას მისცემს, ახალი კლუბი სატრანსფერო თანხისა და დამატებითი პირობების გარეშე, სრულიად დამოუკიდებლად აირჩიოს.

ევროპულ ფეხბურთში მოთამაშესა და კლუბს შეუძლიათ მარტივად მოილაპარაკონ კომპენსაციაზე და კონტრაქტი გააუქმონ. თუმცა, საუდის არაბეთში ვარსკვლავური ტრანსფერების მართვის განსხვავებული სტრუქტურის გამო, ასეთი პირდაპირი გამოსვლა შეუძლებელია - ბენზემა ვერც ცალმხრივად წავა და ვერც მხოლოდ ალ ჰილალის ხელმძღვანელობის თანხმობას დაეყრდნობა.

ვინაიდან რეგიონში ჩასული მაღალი დონის საერთაშორისო ვარსკვლავების კონტრაქტები გარე სახელმწიფო ორგანოთა მიერ სუბსიდირდება, ბენზემას წასვლას მაღალი დონის ადმინისტრაციული ნებართვა სჭირდება. სანამ ფრანგი ფორვარდი გუნდს დაემშვიდობება, ოფიციალური შეთანხმება უნდა შედგეს როგორც საუდის პრო ლიგის ხელმძღვანელობასთან, ასევე შესაბამის პოლიტიკურ სტრუქტურებთან. სანამ ეს უწყებები საბოლოო დასტურს არ გასცემენ, ბენზემა მოქმედ ხელშეკრულებაზე რჩება მიბმული.

თუ ლიგა და სახელმწიფო ორგანოები შეთანხმებას მწვანე შუქს აუნთებენ, ბენზემა თავისუფალი აგენტის სტატუსს მიიღებს. 2022 წლის ოქროს ბურთისა და ჩემპიონთა ლიგის 5-გზის მფლობელს, შეეძლება მომავალი კარიერა სრულიად საკუთარი პირობებით წარმართოს.

ბენზემას ირგვლივ არსებული უკმაყოფილება კლუბის შეცვლიდან სულ რამდენიმე თვეში წარმოიშვა. იგი ალ ჰილალს ოფიციალურად 2026 წლის 4 თებერვალს, ზამთრის სატრანსფერო ფანჯრის ბოლო დღეს შეუერთდა და 1.5-წლიანი კონტრაქტი გააფორმა.

ეს ტრანსფერი მოჰყვა მის სკანდალურ წასვლას ალ იტიჰადიდან, სადაც 2023 წლის ივნისში მადრიდის რეალიდან გადავიდა. ბენზემა ალ იტიჰადს 2024-25 წლების სეზონის ჩემპიონობაში დაეხმარა და სეზონის საუკეთესო მოთამაშეც გახდა.

ფრანგულ მედიაში გავრცელებული ინფორმაციით, ბენზემას სურს, რომ საუდის არაბეთს თავი დააღწიოს და ცოტა ხნით კვლავ ევროპაში დაბრუნდეს, რადგან მისი მთავარი მიზანი ზინედინ ზიდანის მიერ გაწვრთნილ საფრანგეთის ნაკრებში მოხვედრა და დაბრუნებაა, თუმცა მას ამის გაკეთება ძალიან გაუჭირდება.