ავსტრალიის ღია პირველობაზე ნიკოლოზ ბასილაშვილის მეტოქე ცნობილია

ავსტრალიის ღია პირველობის 1/64-ფინალში ნიკოლოზ ბასილაშვილის მეტოქე მსოფლიოს 49-ე ჩოგანი, 19 წლის იაკუბ მენშიკი (ჩეხეთი) იქნება. მატჩი კვირას, 12 იანვარს, გაიმართება.

ქართველმა ჩოგბურთელმა გრანდ სლემის ძირითად ბადეში მოსახვედრად გრძელი გზა გაიარა და 3 მატჩის მოგება შეძლო. ნიკოლოზმა დღეს საკვალიფიკაციო ეტაპის ფინალში ფრანჩესკო პასარო ორ სეტში დაამარცხა.

1/64-ფინალში გამარჯვების შემთხვევაში, ბასილაშვილის მეტოქე კასპერ რუდი ან ხაუმე მუნარი იქნება.

მენშიკმა ავსტრალიის ღია პირველობაზე შარშანაც იასპარეზა და მე-2 რაუნდში ჰუბერტ ჰურკაჩთან წააგო. ჩეხმა პირველ წრეში დენის შაპოვალოვის დამარცხება შეძლო.

რაც შეეხება ბასილაშვილს, ნიკამ ავსტრალიაში 2023 წელს ითამაშა და ტურნირს პირველივე წრიდან გამოეთიშა.