ალკარასიდან შელტონამდე | ხუან კარლოს ფერერო 24 წლის ამერიკელს გაწვრთნის

ჩოგბურთის სამყაროში ერთ-ერთი დიდი მოულოდნელობა დაფიქსირდა - კარლოს ალკარასის ყოფილი მწვრთნელი - ხუან კარლოს ფერერო, ბენ შელტონის სამწვრთნელო შტაბში გადავიდა. სანამ ეს ტრანსფერი ოფიციალურად დადასტურდებოდა, მედიაში ვარაუდობდნენ, რომ ესპანელი სპეციალისტი შესაძლოა რაფაელ ხოდარის, ფელიქს ოჟე-ალიასიმის ან თუნდაც იანიკ სინერის მხარდამხარ გამოჩენილიყო, თუმცა ფერერომ მსოფლიო მე-4 ჩოგანისა და 2026 წლის აშშ-ის ღია პირველობის ფინალისტის, ამერიკელი ბენ შელტონის არჩევა გადაწყვიტა.

ეს თანამშრომლობა 2027 წელს განსაკუთრებული ყურადღების ცენტრში იქნება, რადგან ჩოგბურთის ექსპერტები ახალგაზრდა ამერიკელის თამაშში სერიოზულ ძვრებს ელოდებიან.

ლეგენდარული მწვრთნელის - რიკ მაკის შეფასებით, შელტონთან მუშაობა სრულიად განსხვავებული გამოწვევა იქნება იმასთან შედარებით, რასაც ფერერო ალკარასთან აკეთებდა.

ახალი გაერთიანების ერთ-ერთ მთავარ ტაქტიკურ ამოცანად შელტონის მარცხენა ხელის დარტყმის (ბექჰენდის) დახვეწა სახელდება. რიკ მაკის თქმით, მიუხედავად იმისა, რომ ბენმა მილიონჯერ გაიმეორა ეს მოძრაობა და ტექნიკა გარკვეულწილად მუშაობს, მიწასთან მყარი კონტაქტის ნაკლებობა მას სერიოზულ პრობლემას უქმნის, განსაკუთრებით ბურთის დაბრუნებისას და გრძელ გათამაშებებში.

ფერეროს მთავარი ამოცანა ზუსტად ამ ფარული სუსტი წერტილის აღმოფხვრა იქნება, რათა შელტონმა ისეთი მატჩები, რომლებიც ადვილად უნდა მოიგოს, ზედმეტი ნერვიულობის გარეშე დაასრულოს და მსოფლიო ჩოგბურთის აბსოლუტურ ელიტაში სამუდამოდ დამკვიდრდეს.

აქვე შეგახსენებთ, რომ 10 თვის წინ, კარლოს ალკარასისა და ხუან კარლოს ფერეროს გზები გაიყო და 7-წლიანი დიდი ისტორიის შემდეგ ერთმანეთს ოფიციალურად დაემშვიდობნენ.