ხვალ, 27 აგვისტოს, თბილისის დროით 05:00 საათზე, სტარტს აიღებს ძიუდოს მსოფლიო ჩემპიონატის მე-3 საშეჯიბრო დღე, სადაც საქართველოს ნაკრების ღირსებას -73 კგ წონით კატეგორიაში 2012 წლის ოლიმპიური ჩემპიონი - ლაშა შავდათუაშვილი დაიცავს.
ოლიმპიურ ჩემპიონს ბადეში ნამდვილად არ გაუმართლა, რადგან მას ძალიან რთული ბადე შეხვდა. ლაშა შავდათუაშვილი C ბადეში განთესილია, რაც იმას ნიშნავს, რომ იგი ასპარეზობაში მეორე ეტაპიდან ჩაერთვება. მისი მეტოქე კი სენეგალელ - ტიდიან დიოპსა და ავსტრალიელ - კალვინ ნოსტერს შორის გამარჯვებული იქნება. ვიყოთ რეალურები და ვივარაუდოთ, რომ ლაშა შავდათუაშვილი სენეგალელსა და ავსტრალიელ ძიუდოისტებს შორის გამარჯვებულს დაამარცხებს და შემდეგ ეტაპზე გავა, სადაც მისი მეტოქე არაბ - ვიქტორ სკორტოვსა და ამერიკელ - ნიკოლას დელპოლოს შორის გამარჯვებული იქნება. წესით ლაშას არც ამ ბარიერის დაძლევაც არ უნდა გაუჭირდეს და თავისუფლად უნდა გავიდეს მე-4 ეტაპზე. მე-4 ეტაპზე კი ლაშას მეტოქე ამ წონის ლიდერი, იაპონელი - შოჰეი ონო იქნება.
აქვე უნდა აღინიშნოს, რომ ლაშას ბადეში შოჰეი ონოს გარდა არიან: მონღოლი - ობდაირ განბატარი და იტალიელი - ჯოვანი ესპოსიტო.
-73 კილოგრამ წონით კატეგორიაში 92 სპორტსმენი იასპარეზებს. ჩვენებური ვერსიით, ამ წონის მთავარი ფავორიტი იაპონელი – შოჰეი ონოა. შოჰეი ონო ოლიმპიური, 2-გზის მსოფლიო ( + მოქმედი) და 2-გზის აზიის ჩემპიონია.
შოჰეი ონოს მთავარი პრეტენდენტები 2012 წლის ოლიმპიური ჩემპიონი – ლაშა შავდათუაშვილი, აზერბაიჯანელი – რუსტამ ორუჯოვი და ასევე აზერბაიჯანელი – ჰიდაიატ ჰეიდაროვი იქნებიან.
