"დე ძერბის აინტერესებს" - გიორგი მიქაუტაძის დამატება ტოტენჰემს სურს
3 საათის წინ
ქართული სპორტი
1 წთ
ბრიტანული მედია საშუალება givemesport საქართველოს ნაკრების ცენტრალური ფორვარდის, გიორგი მიქაუტაძის შესახებ ვრცელ სტატიას აქვეყნებს და წერს, რომ მისი დამატება ლონდონის ტოტენჰემის მთავარ მწვრთნელს, რობერტო დე ძერბის სურს.
"ტოტენჰემი ვილიარეალის თავდამსხმელით, გიორგი მიქაუტაძით ინტერესდება, რადგან რობერტო დე ძერბი ყურადღებას შეტევის ხაზისკენ აპყრობს. ზაფხულის სატრანსფერო ფანჯრის განმავლობაში სპურსმა უკვე სარეკორდო თანხა დახარჯა: გუნდის ხარჯმა 290 მილიონ ევროზე მეტი შეადგინა, განსაკუთრებული ყურადღება კი დაცვასა და ნახევარდაცვას დაეთმო.
ისეთი ფეხბურთელები, როგორიცაა იან პოულ ვან ჰეკე, სანდრო ტონალი და მატეუშ ფერნანდეში, უკვე გუნდში არიან. ახლა კი სპურსი ფლანგებზე და შესაძლოა, თავდასხმაშიც კონკურენციის გაზრდაზე კონცენტრირდება. დე ძერბი, როგორც ჩანს, პრიორიტეტად ფლანგის მოთამაშის დამატებას მიიჩნევს, ხოლო თავდამსხმელის ტრანსფერი შესაძლოა რიაშარლისონის ან დომინიკ სოლანკეს წასვლაზე იყოს დამოკიდებული. მიქაუტაძე ერთ-ერთ ვარიანტად განიხილება და აქ ლა ლიგის ამ ფორვარზე ყველაფერს მოგიყვებით.
მიქაუტაძე არის საქართველოს ნაკრების ფეხბურთელი, მაგრამ ის საფრანგეთში ქართველი მშობლების ოჯახში დაიბადა. კარიერა ჟერლანში დაიწყო, საიდანაც მალევე ლიონმა დაიმატა. ამ ამბავში ლიონს კიდევ შევხვდებით, მაგრამ მიქაუტაძემ პირველ გუნდში ფეხი რეალურად მეცში აიდგა: თავდაპირველად მეცის სარეზერვო გუნდში თამაშობდა, ხოლო 2019 წლიდან ძირითადი შემადგენლობის წევრი გახდა. მეცის მაისურით ლიგის 42 მატჩში 25 გოლი გაიტანა და ახალგაზრდა ასაკიდანვე გაითქვა სახელი, როგორც შედეგიანმა თავდამსხმელმა. თუმცა, ამას აიაქსში წარუმატებელი ტრანსფერი მოჰყვა. მიქაუტაძე 19 მილიონ ევროდ შეიძინეს, თუმცა მან ლიგაში მხოლოდ 5 მატჩი ჩაატარა. მიუხედავად ამისა, გატანის უნარი არ დაუკარგავს: მეცში იჯარით დაბრუნებულმა ლიგის 20 შეხვედრაში 13 გოლი შეაგდო. მას შემდეგ, რაც მეცმა გამოსყიდვის უფლება გამოიყენა, ლიონმა ის თითქმის მაშინვე დაიმატა და დაახლოებით 23 მილიონი ევრო გადაიხადა, თან პირობა დადო, რომ სამომავლო გაყიდვიდან 15%-ს გადასცემდა.
მიქაუტაძემ ბრწყინვალე ევრო 2024 ჩაატარა და ტურნირის ერთ-ერთი საუკეთესო ბომბარდირი გახდა, რის შემდეგაც ლიონის რიგებში ლიგის 36 მატჩში 12 გოლი გაიტანა.
სწორედ ამის შემდეგ გამოჩნდა ვილიარეალი, რომელმაც 36 მილიონ ევრომდე ღირებულების შეთანხმებას მიაღწია. "ყვითელი წყალქვეშა ნავის" შემადგენლობაში გატარებულ პირველ სეზონში მას ზუსტად მსგავსი შედეგი ჰქონდა: ლიგის 32 შეხვედრაში 13 გოლი გაიტანა.
წარმოიდგინეთ, ვარ ვილიარეალის გულშემატკივარი, ვცხოვრობ ვალენსიასთან ახლოს და კლუბს 15 წელზე მეტია ვგულშემატკივრობ. გამიმართლა და მიქაუტაძის თამაში უხვად მინახავს. ამ თავდამსხმელს წარმოუდგენელი ტექნიკური ნიჭი აქვს და შეუძლია შეასრულოს ისეთი დამაჯერებელი და ლამაზი დარტყმები, რასაც იშვიათად ნახავთ. თანაც, ორივე ფეხით.
მას ძალიან უყვარს მეკარისთვის ბურთის თავზე გადაგდება, როცა ამის შანსი ეძლევა და საჯარიმოში თუ საჯარიმოს გარეთ ზუსტ დარტყმებს ასრულებს. მიქაუტაძე იმ ფეხბურთელთა რიცხვს მიეკუთვნება, რომლებსაც აქვთ რაღაც განსაკუთრებული, უნიკალური სტილი ბურთის კონტროლისა და თამაშის დროს. ეს მას მცველებისთვის რთულად ასათვისებელს და მეკარეების ნამდვილ კოშმარად აქცევს. ქართველ ფეხბურთელს ბევრი სიჩქარე აქვს და მცველების უკან სირბილში თითქმის ყველა ორთაბრძოლას იგებს, ამასთანავე, ბურთის ფლობის შესანიშნავი ტექნიკით გამოირჩევა, რათა მეტოქეს თვალი გაუსწოროს და მოატყუოს.
ეს რაც შეეხება დადებით მხარეებს. რაც შეეხება ნაკლოვანებებს, როგორც ტანით შედარებით პატარა ფორვარდს, ზოგჯერ ჰქონდა მომენტები, როცა თამაშს გამოეთიშებოდა, განსაკუთრებით უფრო პირდაპირი სტილის მქონე მატჩებში. ვილიარეალის ყოფილმა მწვრთნელმა, მარსელინომ, გასულ სეზონში მასთან იმიტომაც იმუშავა, რომ თამაშში ჩართვის გზები ეპოვა. ამ მხრივ პროგრესი სახეზე იყო, მარსელინომ თებერვალში განაცხადა: "ის ბევრად უფრო ჩართულია. მას თანაგუნდელებთან უკეთესი კოორდინაცია აქვს და ახლა ის თავისუფალი, მოქნილი გონების და ბედნიერია".
მიქაუტაძისგან კიდევ ბევრი რამაა მოსალოდნელი: ის ჯერ მხოლოდ 25 წლისაა და ჯერ კიდევ ეჩვევა ლა ლიგას. თუ ის დარჩება, საინტერესო იქნება იმის ნახვა, თუ როგორ მოარგებს თავის სტილს ახალ მთავარ მწვრთნელ ინიგო პერესს, რომელსაც მარსელინოსაგან სრულიად განსხვავებული სათამაშო სტილი აქვს. ანალოგიურად, თუ ტოტენჰემი მას შეიძენს, საინტერესო იქნება, შეძლებს თუ არა მიქაუტაძე ინგლისის პრემიერ ლიგაში თავისი ბომბარდირული რეპუტაციის შენარჩუნებას.
ამ ეტაპზე ბოლომდე უცნობია, რა ოდენობის გამოსასყიდ პუნქტს შეიცავს მიქაუტაძის კონტრაქტი, თუმცა მოსალოდნელია, რომ ვილიარეალი დაახლოებით 50 მილიონ ევროზე მეტს მოითხოვს. "ყვითელმა წყალქვეშა ნავმა" განაცხადა, რომ ამ ზაფხულს ერთ ფეხბურთელს აუცილებლად გაყიდის, როგორც ეს ტრადიციად აქვთ, მაგრამ მათ არ სურთ თავიანთი მთავარი თავდამსხმელის დაკარგვა, მით უმეტეს, რომ აიოზე პერესი და ხერარდ მორენო ასაკში შედიან", - წერს givemesport.
გიორგი მიქაუტაძე სერენში, მეცში, ამსტერდამის აიაქსსა და ლიონში დაგროვებული გამოცდილების შემდეგ "ყვითელ წყალქვეშა ნავს" შარშან ზაფხულში შეუერთდა და გასულ სეზონში გუნდის საუკეთესო ბომბარდირი გახდა (15 გოლი, 6 საგოლე პასი) და ლა ლიგაში დაკავებული მესამე ადგილით გუნდს უეფას ჩემპიონთა ლიგის საგზურის მოპოვებაში დაეხმარა.
სხვა სტატიები
