11 მაისს სტარტი აიღო ბაქოს გრან სლემის მეორე საშეჯიბრო დღემ, სადაც საქართველოს სახელით 3 სპორტსმენი ასპარეზობდა. მამაკაცებში -73 და -81 კილოგრამ წონით კატეგორიაში საქართველოს ღირსებას: ბექა შავდათუაშვილი (73) , ხოლო -81 კილოგრამ წონით კატეგორიაში: ნუგზარ ტატალაშვილი და ტატო გრიგალაშვილი იცავდნენ.
ბექა შავდათუაშვილი შეჯიბრში მეორე ეტაპიდან ჩაერთო, სადაც მისი მეტოქე ბერძენი - გეორგიოს აზოიდისი იყო. სამწუხაროდ ბექა პირველივე ბრძოლაში დამარცხდა და ბაქოს გრან სლემს ნაადრევად დაემშვიდობა.
ტატო გრიგალაშვილი მეორე ეტაპიდან ჩაერთო საქმეში, სადაც მისი მეტოქე თბილისის გრან პრის გამარჯვებული უძლიერესი ჰოლანდიელი - ფრანკ დე ვიტი იყო. ტატომ მინი სენსაცია მოახდინა და ჰოლანდიელის ბარიერი მარტივად გადალახა. მესამე ეტაპზე მას მასპინძელი - მურად ფატიევი შეხვდა და ტატომ მასთანაც იმარჯვა და 1/4 ფინალის საგზური მოიპოვა. 1/4 ფინალში ტატომ შვედი - რობინ პაჩეკი დაამარცხა და ნახევარფინალში გავიდა, სადაც მისი მეტოქე ბულგარელი - ივაილო ივანოვი იყო. სამწუხაროდ ტატო ნახევარფინალურ ეტაპზე ოქროს დროში დამარცხდა და ოქროს მედლისთვის ვერ იბრძოლებს, თუმცა მას შეუძლია საქართველოს ნაკრებს ბრინჯაოს მედალი მოუპოვოს. ბრინჯაოს მედლისთვის ბრძოლაში ტატო გრიგალაშვილი ბერძენ - ალექსიოს ნტანაციდისს დაუპირისპირდება.
ხოლო რაც შეეხება ნუგზარ ტატალაშვილს, ნუგზარი შეჯიბრში პირველი ეტაპიდან ჩაერთო. მან პირველ ეტაპზე მონტენეგროელი - სრდან მრავლევიჩი მარტივად დაამარცხა და შემდეგ ეტაპზე გავიდა, სადაც ხორვატ - დომინიკ დროზეტას დაუპირისპირდა. ქართველმა ფალავანმა ხორვატის ბარიერი მარტივად გადალახა და მესამე ეტაპზე გავიდა, სადაც ისრაელის წარმომადგენელთან - საგი მუკისთან დამარცხდა და ბაქოს გრან სლემს მესამე ეტაპიდან გამოეთიშა.