ოფიციალურად: დვალიშვილი ო'მალისთან ისევ იჩხუბებს

UFC-ის აღმასრულებელმა დირექტორმა, დანა უაითმა, სოციალურ ქსელში განცხადება გააკეთა რამდენიმე ახალი ბრძოლის შესახებ, რომლებიც ორგანიზაციამ ჩანიშნა. მათ შორის ჩვენთვის ყველაზე საინტერესო ისაა, რომ UFC შონ ო'მალის მერაბთან რევანშის შანსს აძლევს.

7 ივნისს, ნიუ-ჯერსიში, UFC 316-ზე, მერაბ დვალიშვილი და შონ ო’მალი კვლავ დაუპირისპირდებიან ერთმანეთს. "მანქანა" ბოლოს გალიაში თებერვალში იყო, სადაც ერთსულოვანი გადაწყვეტილებით გაიმარჯვა უმარ ნურმაგომედოვზე. ახლა ჩემპიონი ქამარს ნაცნობი მოწინააღმდეგისგან დაიცავს. შეგახსენებთ, რომ გასული წლის სექტემბერში, Noche UFC-ის მთავარ ღონისძიებაზე, დვალიშვილმა მსაჯების ერთსულოვანი გადაწყვეტილებით დაამარცა იმ დროინდელი ჩემპიონი შონ ო'მალი და მას უმსუბუქესი წონის ჩემპიონის ქამარი წაართვა.