მახაჩევის თქმით, დანა უაითი თოფურიას ევლოევისგან იცავს

ჩემპიონობისკენ მიმავალ გზაზე ილია თოფურიას მოვსარ ევლოევთან უთანხმოება ჰქონდა. მებრძოლები სოციალურ ქსელში ერთმანეთს ყოველთვის არასასიამოვნო სიტყვებით მოიხსენიებდნენ. ილია თოფურიამ ევლოევს ვირთხაც კი უწოდა.

სპორტსმენებს შორის აშკარა შუღლის გამო თითქოს ილიასა და მოვსარის ბრძოლა მწიფდებოდა. მაგრამ, თოფურია ჩემპიონი გახდა და ევლოევს ბევრი რამის გაკეთება მოუწევს, რომ "მატადორს" შეხვდეს.

ამ ყველაფერთან დაკავშირებით, განსხვავებული აზრი აქვს მსუბუქი წონის ჩემპიონს ისლამ მახაჩევს. კავკასიელი მებრძოლი თვლის, რომ დანა უაითი ევლოევს ილიას უმალავს.

ილიას ახლა სულ სხვა საქმეები აქვს და ევლოევისთვის არ სცალია. UFC 300-ის ერთ-ერთმა მთავარმა მოქმედმა პირმა - მაქს ჰოლუეიმ "მატადორი" გამოიწვია, რაზეც ილიამ თანხმობით უპასუხა. UFC-ის პირველი ქართველი ჩემპიონი მაქს ჰოლოუეისთან ბრძოლაზე იქამდეც საუბრობდა, სანამ ვოლკანოვსკის ქამრისთვის ჩხუბში დაანოკაუტებდა. ახლა კი, როცა მაქსმა ბრწყინვალე სანახაობა დადგა და თანაც ილია ჩემპიონია, მათი პირისპირ დგომის შანსი საკმაოდ დიდია.