გამარჯობა ნიკოლოზ, შენს ბავშვობაზე რომ მოგვიყვე, როგორ გარემოში იზრდებოდი და სად დაიწყე ძიუდოში ვარჯიში?
გავიზარდე თბილისში, ბავშობიდან სპორტით ვარ დაკავებული. 4 წლის ვიყავი როდესაც ცურვაზე მივედი, შემდეგ წყალბურთზე და უკვე 10 წლის ასაკში ძიუდოზე შევედი, სადაც ჩემი პირველი მწვრთნელი ბატონი ვაჟა ბალხამიშვილი გახლდათ, რომელსაც დღემდე დიდ პატივს ვცემ, არამხოლოდ მე არამედ მთელი ჩემი ოჯახი, რადგან მამაჩემის მწვრთნელიც ის გახლდათ და ოჯახს ახლო ურთიერთობა გვაქვს.
როგორ გაიხსენებ მსოფლიო ჩემპიონობას? იყო რაიმე დეტალი რამაც განსაკუთრებული ძალა შეგძინა?
ძალიან კარგი გასახსენებელია რადგან ბავშობიდან ჩემი ოცნება იყო და ასე ვთქვათ ავიხდინე ბავშობის ოცნება. ასევე ძალიან დიდი როლი ითამაშა იმ ფაქტმა რომ ჩემი ოჯახის წევრები და მეგობრები ამ წუთებში დარბაზში იყვნენ, რამაც მეტად გამაძლიერა და საბოლოოდ მსოფლიოს ჩემპიონი გავხდი.
ვინ არის შენი ფავორიტი ძიუდოისტი და რატომ?
ჩემი მეგობარი და უკვე ოჯახის წევრი ვარლამ ლიპარტელიანი. იყო ასეთ მაღალ დონეზე და ასეთი სტაბილური ამდენ ხანს ძალიან გამოსარჩევი თვისებაა და არ დავიწყებ მისი ტიტულების ჩამოთვლას რადგან ყველა კარგად იცის თუ რა მიღწევები აქვს ვარლამს მის კარიერაში.
ბაქოს გრანდ სლემზე ჩემპიონობა ვერ მოახერხე და დიდი ხნის შემდეგ პირველად დამარცხდი, რა იყო ამის მიზეზი?
შეცდომები რომლის გამოსწორებაზეც უკვე ვმუშაობთ.
ვინ არის შენთვის ყველაზე უხერხული მეტოქე?
უხერხული მეტოქეა ყველა, ვინც არამხოლოდ ფიზიკურადაა ძლიერი არამედ მაღალი საჭიდაო ინტელექტიც გააჩნია.
რა გეგმები გაქვს 2020 წლის ოლიმპიადაზე და როდის იწყებ აქტიურ მომზადებას?
მომზადება დაწყებულია უბრალოდ მანამდე ბევრი ტურნირია გასავლელი.
დავამატებ იმასაც რომ ძალიან მადლობელი ვარ ქართველი ხალხის გულშემატკივრობისათვის და მადლობა ყველას გვერდში დგომისთვის მოკითხვა ყველას ესპანეთიდან.