ტრაგედია ალჟირში - სტადიონის მოაჯირის ჩამონგრევის შედეგად 3 ადამიანი გარდაიცვალა

ალჟირში, ,,5 ივლისის'' სტადიონზე, MC Alger-სა და მაგრას შეხვედრის დასრულების შემდეგ, ტრაგედია მოხდა.

მასპინძელი გუნდის გულშემატკივრები ჩემპიონობას აღნიშნავდნენ, როცა სტადიონის ზედა იარუსზე მოაჯირის ნაწილი ჩამოინგრა, რასაც 3 ადამიანის სიცოცხლე ემსხვერპლა, 80 კი დაშავდა.

ინციდენტის შემდეგ, სამძიმრის წერილები ქვეყნის პრეზიდენტმა, არაერთმა ოფიციალურმა პირმა და საფეხბურთო კლუბმა გაავრცელა. როიტერის ცნობით, MC Alger-ის რამდენიმე ფეხბურთელი დაშავებულთათვის სისხლის ჩასაბარებლად საავადმყოფოში მივიდა.

,,5 ივლისის'' სტადიონი, რომელიც 62 000 მაყურებელს იტევს, 1972 წლის 17 ივნისს გაიხსნა, მას შემდეგ არენა 6-ჯერ გარემონტდა, მათ შორის ბოლოს 2022 წელს.