მილანის ახალი გეგმა - გლასნერი მწვრთნელად, ალაბა კი დაცვის ლიდერად

„Corriere dello Sport“-ის ინფორმაციით, ოლივერ გლასნერი მილანის ახალი მთავარი მწვრთნელი გახდება. მხარეებს შორის უკვე მიღწეულია შეთანხმება. იტალიური სპორტული გაზეთის ცნობით, გასულ ორშაბათს მილანსა და 51 წლის მწვრთნელს შორის დამატებითი მოლაპარაკებები გაიმართა, რომლებმაც ძალიან წარმატებით ჩაიარა.

გლასნერისთვის მილანური კლუბის ჩაბარება აშკარად საოცნებო სამუშაოა. აინტრახტისა და კრისტალ პალასის ყოფილმა მწვრთნელმა, სხვა შესაძლო ვარიანტები შეგნებულად უარყო.​

საბოლოო გადაწყვეტილება მილანის მფლობელ გერი კარდინალესა და კლუბის მრჩეველ ზლატან იბრაჰიმოვიჩზეა დამოკიდებული. მათი თანხმობის შემთხვევაში, შეთანხმება ოფიციალურად გაფორმდება.

გლასნერი ცნობილია თავისი ინტენსიური, მაღალ პრესინგზე დაფუძნებული სათამაშო სტილით, რომელიც ბურთის სწრაფ დაბრუნებასა და მუდმივად მაღალ ტემპს ეფუძნება. ეს რადიკალურად განსხვავდება მასიმილიანო ალეგრის ფრთხილი და დაცვაზე ორიენტირებული ფეხბურთისგან.​სწორედ ასეთი მიდგომა გახდა ერთ-ერთი მიზეზი, რის გამოც მილანმა გასულ სეზონში ჩემპიონთა ლიგის საგზური ვერ მოიპოვა.

მწვრთნელს გუნდის გადახალისების უკვე მკაფიო გეგმა აქვს და მასში ერთ-ერთი მთავარი ფიგურა დავიდ ალაბაა. „Gazzetta dello Sport“-ის ცნობით, გლასნერი ავსტრიის ეროვნული ნაკრების კაპიტნის „მილანში“ გადმოსვლას ითხოვს.

რეალ მადრიდის უნივერსალური მცველი „სან სიროზე“ ახალი დაცვის ლიდერი უნდა გახდეს. თუმცა ეს ტრანსფერი გარკვეულ რისკებსაც შეიცავს: 2023/24 წლების სეზონიდან ალაბას არაერთი სერიოზული ტრავმა აწუხებდა, მათ შორის მუხლის ჯვარედინი იოგის გაწყვეტა, ასევე კუნთისა და მენისკის პრობლემები.

მიუხედავად ამისა, გლასნერი თანამემამულის შესაძლებლობებში დარწმუნებულია და მიიჩნევს, რომ ალაბას გამოცდილება, ლიდერული თვისებები და საერთაშორისო დონეზე დაგროვილი ცოდნა ამ რისკს ამართლებს.

მილანში მხოლოდ სამწვრთნელო შტაბის ცვლილება საკმარისი ვერ იქნება, ეს კლუბის მსფლობელებმა კარგად იციან, ამიტომ განიხილება ფართომასშტაბიანი რესტრუქტურიზაცია. „Corriere dello Sport“-ის ცნობით, ავსტრიის ეროვნული ნაკრების ყოფილი მთავარი მწვრთნელი რალფ რანგნიკი კვლავ რჩება ტექნიკური დირექტორის პოსტზე ერთ-ერთ შესაძლო კანდიდატად.