ვალენტინ ბარკო ჩელსიში გადავიდა

ემანუელ ემეგას შემდეგ, ვალენტინ ბარკო მეორე ფეხბურთელია, რომელიც ამ სატრანსფერო ფანჯრის დროს, სტრასბურგიდან „ლურჯებს“ შეუერთდა. გასული სეზონის დასაწყისიდან მოყოლებული, ეს უკვე მე-13 გარიგებაა ორ კლუბს შორის - ისინი საერთო მფლობელთა ჯგუფის დაქვემდებარებაში არიან.

22 წლის ფეხბურთელი არგენტინის იმ ნაკრების წევრი გახლდათ, რომელმაც მსოფლიო ჩემპიონატის ფინალს მიაღწია. ნახევარფინალში ინგლისის ნაკრების ფეხბურთელების წინაშე ემოციური აღნიშვნის გამო, მას ჯუდ ბელინგემთან მწვავე დაპირისპირებაც ჰქონდა და ბელინგემისგან კეფაში ხელიც მოხვდა.

მარცხენა მცველისა და ნახევარდაცვის პოზიციაზე თამაშის უნარის მქონე ბარკომ, პრემიერ ლიგაში ძალების მოსინჯვა უკვე მოასწრო - სამი სეზონის წინ ის მოკლე პერიოდით ბრაიტონში ირიცხებოდა.

ბარკოს ტრანსფერი ჩელსისთვის დატვირთული ზაფხულის გაგრძელებაა - ლონდონელები ახალი თავკაცის, ხაბი ალონსოს ხელმძღვანელობით შემადგენლობის საფუძვლიან გადაწყობას ცდილობენ.

შაბათს „ლურჯებმა“ ბრაიტონიდან ვეტერანი თავდამსხმელის, დენი უელბეკის დამატება დაადასტურეს, მანამდე კი კლუბს კრისტალ პალასიდან მაქსენს ლაკრუა და ასტონ ვილიდან მორგან როჯერსი შეუერთდნენ.