უკრაინის ნაკრები საქართველოს ცუდ მდგომარეობაში ხვდება

უკრაინის ეროვნულ ნაკრებს, ერთა ლიგის ეგიდით, ოქტომბერში 2 მატჩის გამართვა მოუწევს. პირველი საქართველოსთან, 11 ოქტომბერს გაიმართება და როგორც უკრაინულ მედიაში ვრცელდება ინფორმაცია, მათ გუნდში ყველაფერი რიგზე არ არის. საკადრო პრობლემებია როგორც ტრავმირებულთა კუთხით, ასევე გაუგებარი მიზეზების გამოც.

შეგახსენებთ, რომ უკრაინა საქართველოსთან, ალბანეთთან და ჩეხეთთან ერთად, ერთა ლიგის B დივიზიონის პირველ ჯგუფშია. ჩატარებულ 2 შეხვედრაში უკრაინა 0 ქულით ბოლო ადგილზეა, რებროვის გუნდი ჯერ ალბანეთთან 2:1 დამარცხდა, შემდეგ კი ჩეხეთთან წააგო (3:2). ჯგუფს საქართველოს ნაკრები 6 ქულით ლიდერობს.