რომელ ქვეყნებშია სატრანსფერო ფანჯარა ჯერ კიდევ ღია?

ევროპის წამყვან ჩემპიონატებში ზაფხულის სატრანსფერო ფანჯარა უკვე დაიხურა, თუმცა რამდენიმე ქვეყანაში კლუბებს ახალი მოთამაშეების დამატების შესაძლებლობა კვლავ აქვთ. ევროპაში ნიდერლანდურ კლუბებს დამატებით რამდენიმე საათი დარჩათ - მათთან ბაზარი 2 სექტემბერს იხურება.

შოტლანდიაში სატრანსფერო ფანჯრის ბოლო ვადად 3 სექტემბერი, 17:00 საათი განისაზღვრა. თურქეთს, რომელიც ბოლო სატრანსფერო პერიოდებში მნიშვნელოვან მიმართულებად იქცა, ტრანსფერების განხორციელება 4 სექტემბრამდე შეუძლია. კიდევ უფრო მეტი დრო აქვთ პორტუგალიურ კლუბებს: ბენფიკას, სპორტინგს, პორტუსა და მათ კონკურენტებს ახალი ფეხბურთელების დარეგისტრირება 15 სექტემბრამდე შეუძლიათ. ეს ბაზრები განსაკუთრებით კარგი შანსია იმ მოთამაშეებისთვის, რომლებიც ევროპის გრანდებში არასასურველნი გახდნენ.

ევროპის მიღმაც რამდენიმე სატრანსფერო ფანჯარა ღია რჩება. MLS-ში (აშშ) ბაზარი 2 სექტემბერს იხურება, ხოლო მექსიკურ და ბრაზილიურ კლუბებს შემადგენლობის გაძლიერება 11 სექტემბრამდე შეუძლიათ. ყველაზე დიდი მანევრირების საშუალება მაინც საუდის არაბეთს აქვს - საუდი პრო ლიგის კლუბებს ტრანსფერების განხორციელების უფლება 12 ოქტომბრამდე აქვთ. ეს საკმაოდ ხანგრძლივი პერიოდია, რაც მათ საშუალებას მისცემს, ევროპული ბაზრების დახურვით ისარგებლონ და ის ფეხბურთელები მიიზიდონ, რომლებმაც ზაფხულში ახალი გუნდი ვერ იპოვეს.