პენსიაზე გასვლის გეგმა? „მესი ითამაშებს იმდენ ხანს, რამდენიც თავად მოუნდება“

ლიონელ მესის საფეხბურთო კარიერის დასრულებასთან დაკავშირებით, არგენტინის ნაკრების მთავარმა მწვრთნელმა, ლიონელ სკალონიმ განცხადება გააკეთა. 48 წლის სპეციალისტმა აღნიშნა, რომ მსოფლიო ფეხბურთის ლეგენდა იმდენ ხანს ითამაშებს, რამდენსაც თავად ჩათვლის საჭიროდ.

„ალბისელესტეს“ თავკაცი სრულად ენდობა თავის ლიდერს და დარწმუნებულია, რომ როდესაც შესაბამისი დრო მოვა, მესი გადაწყვეტილებას თავად მიიღებს. სკალონიმ ასევე აღნიშნა, რომ არგენტინელთა ათიანს, წარმატების მიღწევის დაუოკებელი სურვილი დღემდე არ დაუკარგავს, რაშიც მას, მისი გამორჩეული მენტალიტეტი ეხმარება. წლევანდელი მუნდიალის გაფართოებული ფორმატის გამო, მესის სათამაშო დროსთან დაკავშირებით, გარკვეული კითხვები გაჩნდა. სკალონიმ ხაზგასმით აღნიშნა, რომ მესისთან დაკავშირებული ნებისმიერი გადაწყვეტილება, ურთიერთპატივისცემასა და მასთან შეთანხმებაზეა დაფუძნებული და არა გარკვეული ტიპის ფიზიკურ შეზღუდვებზე.

ამრიგად, არგენტინის ნაკრებში მიაჩნიათ, რომ მესის მნიშვნელობა მხოლოდ მისი ფიზიკური შესაძლებლობებით არ განისაზღვრება - მოედანზე მისი ლიდერობა, ავტორიტეტი და გავლენა, ხშირად, ისეთივე ღირებულია, როგორც მისი უშუალო სათამაშო ფორმა.

არგენტინა, ამჟამად,  ბოლო მოსამზადებელ ეტაპს გადის და უახლოეს დღეებში, ჰონდურასისა და ისლანდიის წინააღმდეგ ამხანაგურ მატჩებს გამართავს. ამის შემდეგ კი, მსოფლიო ჩემპიონატის პირველ ოფიციალურ მატჩს, 16 ივნისს, ალჟირის წინააღმდეგ ჩაატარებს.