ოფიციალურად: ლეაომ მილანთან კონტრაქტი გაახანგრძლივა

ოფიციალურად დადასტურებული ინფორმაციის თანახმად, რაფაელ ლეაო "მილანის" ღირსებას 2028 წლის 30 ივნისამდე დაიცავს.

"როსონერის" ოფიციალურ ვებგვერდზე განთავსებულ განცხადებაში აღნიშნულია, რომ პორტუგალიელ ვარსკვლავთან მიმდინარე მოლაპარაკებები წარმატებით დასრულდა, რის შემდეგაც ლეაომ 5-წლიან კონტრაქტს მოაწერა ხელი.

"მილანს" განახლებული კონტრაქტის ოფიციალური პირობები არ გაუსაჯაროვებია, თუმცა, მედია საშუალებები აღნიშნავენ, რომ პორტუგალიელის ანაზღაურება 7 მილიონ ევრომდე გაიზრდება, რომელსაც სამომავლო ბონუსების სახით კიდევ 2 მილიონი ევრო დაემატება. ასევე ცნობილია, რომ ლეაოს გამოსასყიდი თანხა 150 მილიონი ევრო გახდება.

შეგახსენებთ, პორტუგალიელი ვარსკვლავი “როსონერის” 2019 წლის 1 აგვისტოს შეუერთდა და გუნდის ერთ-ერთ გამორჩეულ მოთამაშედ ჩამოყალიბდა. სერია A-ს მიმდინარე სეზონში, ლეაომ 12 გოლის გატანა და 7 საგოლე გადაცემის შესრულება შეძლო.