ნეიმარი: "გამაფრთხილეს, რომ ამ ტრავმის შემდეგ დაბრუნება გამიჭირდებოდა - ასეც მოხდა..."

აზიის ჩემპიონთა ლიგის მე-4 ტურში, ,,ალ ჰილალმა'' ირანულ ,,ესტეგლალს'' უმასპინძლა და 3:0 დაამარცხა.

მატჩი განსაკუთრებულად მნიშვნელოვანი იყო იმ ფაქტის გამო, რომ მასპინძელთა განაცხადში მოხვდა ნეიმარი, რომელსაც უმძიმესი ტრავმის გამო 2023 წლის 18 ოქტომბრის შემდეგ არ უთამაშია.

რამდენიმე კვირის წინ, ,,ალ ჰილალის'' მთავარმა მწვრთნელმა განაცხადა, რომ 32 წლის ფეხბურთელი მოედანს, სავარაუდოდ, იანვარში დაუბრუნდებოდა, თუმცა, როგორც ჩანს, მის სრულად გამოჯანმრთელებას მოსალოდნელზე ნაკლები დრო დასჭირდა და მოედანს დაუბრუნდა, თუმცა დაბრუნება კვლავ წარუმატებელი და უიღბლო აღმოჩნდა 32 წლის ბრაზილიელისთვის.

ნეიმარი აზიის ჩემპიონთა ლიგის მატჩში 58-ე წუთზე ჩაერთო, თუმცა ბრაზილიელმა ტრავმა მიიღო და მოედანი 87-ე წუთზე დატოვა.

მატჩის დასრულების შემდეგ, ნეიმარს სამედიცინო კვლევები ჩაუტარდა, რის შედეგადაც გაირკვა, რომ მისი ტრავმა სერიოზული არ არის და მომდევნო მატჩებში სავარაუდოდ მზად იქნება.

ბრაზილიელ ვარსკვლავს ,,ალ ჰილალის'' მაისურით სულ 6 შეხვედრა აქვს ჩატარებული, რომლებშიც 1 გოლი გაიტანა და 3 საგოლე გადაცემა მიითვალა.