მოგების აღნიშვნას გვინეის 6 გულშემატკივარი შეეწირა

გვინეის ფეხბურთის ფედერაცია და ყოფილი ვარსკვლავი პასკალ ფეინდუნო გვინეის ნაკრების გულშემატკივრებს სიმშვიდისკენ მოუწოდებს. მას შემდეგ რაც მათმა ქვეყანამ აფრიკის თასზე პირველი შეხვედრა მოიგო, ფანების ზეიმი არეულობაში გადაიზარდა და 6 ადამიანი დაიღუპა.

BBC-ის ინფორმაციით, გამბიასთან გამარჯვების შემდეგ, გვინეის დედაქალაქი კონაკრი ავტომობილებითა და მოტოციკლებით გაივსო, რამაც კოლაფსი გამოიწვია.

გვინეა არის ქვეყანა, სადაც ხალხი გატაცებულია ფეხბურთით და ისინი გამორჩეულად ემოციურად განიცდიან წარმატებასაც და წარუმატებლობასაც. C ჯგუფში გვინეა 4 ქულით მეორე ადგილს იკავებს, სენეგალს ორიდან ორი მოგება აქვს და პირველზეა. ჯგუფური ეტაპის ბოლო ტურის შეხვედრაში ერთმანეთს სწორედ გვინეა და სენეგალი დაუპირისპირდებიან.