მესის გარეშეც შეძლებიათ | არგენტინამ ბოლივია გაანადგურა

მსოფლიო ჩემპიონატის ფინალში განცდილი მარცხის შემდეგ, არგენტინის ეროვნულმა ნაკრებმა მოედანზე დაბრუნება შთამბეჭდავი გამარჯვებით აღნიშნა. „ესტადიო მარიო ალბერტო კემპესზე“ გამართულ ამხანაგურ შეხვედრაში „ალბისელესტემ“ ბოლივიის ნაკრები 4:0 გაანადგურა და ბოლო 16 საერთაშორისო მატჩში მე-15 გამარჯვება ჩაიწერა აქტივში.

ეს სამხრეთამერიკული დაპირისპირება პირველი იყო იმ ორი ამხანაგური შეხვედრიდან, რომლებიც გუნდმა 6 ოქტომბერს, ბენინის წინააღმდეგ ლიონელ მესის გამოსამშვიდობებელი მატჩის წინ დაგეგმა.

მესის ეპოქის შემდგომ პერიოდში ძირითად შემადგენლობაში დამკვიდრების პრეტენზია დაუყოვნებლივ განაცხადა ლაუტარო მარტინესმა, რომელმაც ანგარიში პირველი ტაიმის შუაწელში გახსნა - ინტერის ვარსკვლავმა საჯარიმოს მისადგომებთან ბურთი მიიღო, ბოლივიელთა დაცვის ოდნავ უკან დახევას დაელოდა და ზუსტი დარტყმით ქვედა კუთხეში გაიტანა. მატჩამდე ლიონელ სკალონიმ დაადასტურა, რომ ლეგენდარული 10-ნომრიანი მაისურით მესის გაცილების შეხვედრამდე არავინ ითამაშებდა, თუმცა ამ ნომრის ერთ-ერთ მთავარ პრეტენდენტად კომოს შემტევი ნიკო პასი მოიაზრება. 30-ე წუთზე სწორედ პასმა გაიტანა მეორე გოლი, როდესაც ექსეკიელ პალასიოსის შესანიშნავი გადაცემის შემდეგ ბურთი მეკარეს თავს ზემოთ ოსტატურად გადაუგდო.

მეორე ტაიმის დებიუტში თავად პასმა საგოლე გადაცემა ჩაიწერა აქტივში - მისი ჩაწოდებული ჯარიმის შემდეგ ნაკრების ახალდანიშნულმა კაპიტანმა კრისტიან „კუტი“ რომერომ თავური დარტყმით ანგარიში 3:0 გახადა. მატჩის მიწურულს კი შეცვლაზე შესულმა ფლაკო ლოპესმა ეროვნულ ნაკრებში სადებიუტო გოლი გაიტანა და საბოლოო ანგარიში დააფიქსირა.

ამ გამარჯვებით არგენტინამ ბოლივიასთან ზედიზედ მეოთხე მშრალი მოგება მოიპოვა, ახლა კი "ალბისელესტეს“ მხოლოდ ერთი მატჩი აშორებს იმ ემოციურ საღამომდე, სადაც ლეგენდარული ლიონელ მესი სანაკრებო კარიერას საბოლოოდ დაასრულებს.